នៅយប់ថ្ងៃទី១៣ ខែមីនា ឆ្នាំ២០២៥ ចាប់ពីម៉ោង ២០:០០នាទី ដល់ម៉ោង២៣:០០នាទីគណៈបញ្ជាការឯកភាពរដ្ឋបាលរតនគិរី បានចុះរឹតបន្តឹងការអនុវត្តច្បាប់ចរាចរណ៍ផ្លូវគោក ឃាត់យានយន្ដតុបតែងភ្លើងខុសលក្ខណៈបច្ចេកទេស និងអ្នកបើកបរម៉ូតូមិនពាក់មួកសុវត្ថិភាព បានចំនួន ៥១គ្រឿង។

លោក វរសេនីយ៍ឯក ម៉ា សំអាត នាយការិយាល័យនគបាលចរាចរណ៍ផ្លូវគោកបានដឹកនាំកម្លាំងចំនួន២៥នាក់ចុះធ្វើការរឹតបន្តឹងការអនុវត្តច្បាប់ចរាចរណ៍ផ្លូវគោក ក្នុងភូមិសាស្ត្រខេត្តរតនគិរី ស្ថិតនៅចំណុចគោលដៅមុខវិទ្យាល័យសម្ដេចឪ សម្ដេចម៉ែ ស្ថិតនៅភូមិអភិវឌ្ឍន៍ សង្កាត់ឡាបានសៀក ក្រុងបានលុង ខេត្តរតនគិរី។

ជាលទ្ធផលក្រុមការងារ បានត្រួតពិនិត្យយានយន្តឆ្លងកាត់ សរុបចំនួន ១១២ គ្រឿងក្នុងនោះ ឃាត់យានយន្ដតុបតែងភ្លើងខុសលក្ខណៈបច្ចេកទេស និងអ្នកបើកបរម៉ូតូមិនពាក់មួកសុវត្ថិភាព បានចំនួន ៥១គ្រឿងមានដូចជា ៖

 - រថយន្ដធុនស្រាលចំនួន ១១ គ្រឿង

 - រថយន្ដធុនធ្ងន់ចំនួន ០៦ គ្រឿង

 - ម៉ូតូសណ្ដោងរុឺមកចំនួន ០៣ គ្រឿង

 - ម៉ូតូកង់បីចំនួន ០៦ គ្រឿង

 - អ្នកបើកបរម៉ូតូមិនពាក់មួកសុវត្ថិភាពមានចំនួន ២៥រឿង។

សូមបញ្ជាក់ថា ករណីល្មើសច្បាប់ចរាចរណ៍ផ្លូវគោកខាងលើ កម្លាំងនគរបាលចរាចរណ៍បានធ្វើការអប់រំណែនាំនៅគោលដៅ ដើម្បីអោយចូលរួមគោរពច្បាប់ចរាចរណ៍ផ្លូវគោកទាំងអស់គ្នា ប៉ុន្តែពុំបានធ្វើការផាកពិន័យនោះទេ៕