ក្រុមបាល់ទាត់ជម្រើសជាតិវៀតណាម ក្លាយជាម្ចាស់ជើងឯកពានប្រចាំតំបន់អាស៊ីអាគ្នេយ៍ ASEAN Mitsubishi Cup 2024 ក្រោយយកឈ្នះទៅលើគូប្រកួតដែលជាម្ចាស់ផ្ទះថៃ ក្នុងជើងទី២វគ្គផ្តាច់ព្រ័ត្រនារាត្រីថ្ងៃអាទិត្យ ទី៥ ខែមករា ឆ្នាំ២០២៥។  នេះជាលើកទី៣ហើយសម្រាប់ក្រុមបាល់ទាត់ជម្រើសជាតិវៀតណាម ដែលអាចដណ្តើមបានពាន ក្នុងព្រឹត្តិការណ៍ប្រកួតបាល់ទាត់ ASEAN Mitsubishi Cup 2024 ក្នុងនាមជាក្រុមធ្លាប់ឈ្នះ ២លើកកន្លងមកកាលឆ្នាំ២០០៨ និងឆ្នាំ២០១៨កន្លងទៅ។ 

ក្នុងការប្រកួតវគ្គផ្តាច់ព្រ័ត្រជើងទី២កាលពីយប់មិញនេះ បានបើកការនាំមុខក្នុងលទ្ធផល ២ ទល់និង១ ក៏ប៉ុន្តែក្រោយពេលបាត់បង់កីឡាករ ១រូប ក្រុមម្ចាស់ផ្ទះថៃមួយនេះត្រូវបានវៀតណាមដែលជាជើងឯករងកាលឆ្នាំ២០២២ បានដណ្តើមគ្រាប់បាល់និងស៊ុតបញ្ចូលទីនាំមុខក្នុងលទ្ធផល ៣ ទល់និង២ វិញ នៅក្នុងប្រកួតដ៏ស្វិតស្វាញដែលមានការថែមម៉ោងដល់ទៅ ១៥នាទីឯណោះ។

ក្រៅពីក្លាយជាម្ចាស់ជើងឯកពានប្រចាំតំបន់អាស៊ីអាគ្នេយ៍ ASEAN Mitsubishi Cup 2024 ក្រុម ជម្រើសជាតិវៀតណាមក៏ដណ្តើមបានស្បែកជើងមាស Golden Boot ប្រចាំព្រឹត្តិការណ៍នេះដែរ គឺខ្សែប្រយុទ្ធ Nguyen Xuan Son ដែលរកបាន ៧គ្រាប់ច្រើនជាងគេតាមពីក្រោយដោយកីឡាករ ៤រូបដែលរកបានតែ ៤គ្រាប់ប៉ុណ្ណោះ។ 

ជាមួយនឹងលទ្ធផលដែលជាទីមោទកសម្រាប់ប្រទេសវៀតណាមនាឱកាសនេះ ក៏មានប្រជាពលរដ្ឋជាច្រើនកុះករនៅទូទាំងប្រទេសវៀតណាមជាពិសេសអ្នកស្នេហាវិស័យកីឡាបាល់ទាត់បានចូលរួមអបអរសាទរដោយអ្នកខ្លះបានកាន់ទង់ជាតិប្រទេសរបស់ខ្លួនដង្ហែនៅតាមដងផ្លូវ និងខ្លះទៀតលើកដៃ ស្រែកហ៊ោក្នុងទិដ្ឋភាពមួយដែលបង្ហាញពីការគាំទ្រយ៉ាងខ្លាំងចំពោះលទ្ធផលមួយនេះផងដែរ៕