ជាការពិតណាស់ ស្ពៃក្តោបគឺជាបន្លែស្លឹកបៃតងក្នុងគ្រួសារតែមួយជាមួយបន្លែដែលមានជាតិគីមីដូចជា ខាត់ណាផា្ក និងប្រូខូលីជាដើម ។ ស្ពៃក្តោបមានច្រើនប្រភេទ រួមមាន ក្រហម ពណ៌ស្វាយ បៃតង និងស ប៉ុន្តែស្ពៃក្តោបពណ៌បៃតងគឺពេញនិយមបំផុត ដែលអាចបរិភោគជាបន្លែស្រស់ ឬជាអន្លក់ និងយកទៅធ្វើម្ហូបផ្សេងៗទៀត។ ស្ពៃក្តោបសម្បូរទៅដោយសារធាតុចិញ្ចឹមសំខាន់ៗជាច្រើនដូចជា វីតាមីន សារធាតុរ៉ែ សារធាតុប្រឆាំងអុកស៊ីតកម្ម និងជាតិសរសៃ ដែលធ្វើឱ្យវាមានអត្ថប្រយោជន៍ច្រើនសម្រាប់សុខភាព និងសម្រស់ ប៉ុន្តែការទទួលទានស្ពៃក្តោបច្រើនពេកអាចផ្តល់ផលអវិជ្ជមានដល់សុខភាព។ ដូច្នេះ​គួរ​ប្រយ័ត្ន​ពេល​ទទួលទាន ​ដែលផលប៉ះពាល់សុខភាពរបស់ស្ពៃក្តោបមានដូចជា៖

១. ហានិភ័យនៃការវិវត្តទៅជាជំងឺពកក៖ ស្ពៃក្តោបគឺជាបន្លែដែលមានជាតិសរសៃខ្ពស់។ វាជួយឱ្យប្រព័ន្ធរំលាយអាហារដំណើរការបានល្អ ប៉ុន្តែប្រសិនបើអ្នកញ៉ាំច្រើនពេក អាចបណ្តាលឱ្យមានបញ្ហាសុខភាព ដោយសារតែវាមានផ្ទុក goitrogens ដែលរំខានដល់ការស្រូបយកអ៊ីយ៉ូតធ្វើឱ្យអ្នកមានហានិភ័យនៃការវិវត្តទៅជាជំងឺពកក។

២. អាចបណ្តាលឱ្យមានការប្រមូលផ្តុំនៃសំណល់គីមី៖ ស្ពៃក្តោបដាំដុះដោយប្រើសារធាតុគីមី នៅពេលបរិភោគឆៅ អាចបណ្តាលឱ្យរាងកាយទទួលបានសំណល់គីមី។

៣. សម្រាប់អ្នកដែលមានអាលែហ្សីជាមួយបន្លែក្នុងចង្កោមប្រភេទស្ពៃក្តោប គួរតែត្រូវបានជៀសវាងព្រោះវាអាចបណ្តាលឱ្យមានប្រតិកម្មអាលែហ្សី រួមទាំងក្អួត កន្ទួល ហើមមុខ និងអណ្តាត។

៤. អ្នកជំងឺទឹកនោមផ្អែម និងអ្នកដែលមានមុខងារក្រពេញទីរ៉ូអ៊ីតមិនប្រក្រតី ក៏គួរចៀសវាងទទួលទានស្ពៃក្តោបដែរ។ នេះដោយសារតែស្ពៃក្តោបអាចបណ្តាលឱ្យក្រពេញទីរ៉ូអ៊ីតមិនសូវសកម្ម ដែលរំខានដល់ការផលិតអរម៉ូននៅក្នុងក្រពេញទីរ៉ូអ៊ីត។

៥. ស្ពៃក្តោបជួយកាត់បន្ថយកម្រិតជាតិស្ករក្នុងឈាម។ ប្រសិនបើបរិភោគក្នុងបរិមាណច្រើន ជាពិសេសអ្នកដែលត្រូវវះកាត់ ដែលអាចបណ្តាលឱ្យកម្រិតជាតិស្ករក្នុងឈាមរបស់អ្នកធ្លាក់ចុះទាបពេកអំឡុងពេលវះកាត់។ វាអាចនាំឱ្យមានការប្រកាច់ និងបាត់បង់ស្មារតី។ ដូច្នេះ​គួរ​បញ្ឈប់​ការ​ទទួលទាន​ស្ពៃក្តោប​យ៉ាង​ហោច​ណាស់ ២ សប្តាហ៍​មុន​នឹង​វះកាត់។

ដើម្បីកាត់បន្ថយហានិភ័យនៃបញ្ហាទាំងនេះ ស្ពៃក្តោបត្រូវលាងសម្អាតឱ្យបានហ្មត់ចត់ជាមួយនឹងថ្នាំសំលាប់មេរោគមុនពេលចម្អិនអាហារ។ ការចម្អិនអាហារដោយប្រើកំដៅកាត់បន្ថយបរិមាណនៃសំណល់គីមីនិងបំផ្លាញ goitrogens៕