ល្ពៅជាបន្លែពណ៌លឿងដែលមានអាហារូបត្ថម្ភច្រើនប្រភេទ សម្បូរទៅដោយវីតាមីន និងសារធាតុរ៉ែសំខាន់ៗដែលមានប្រយោជន៍ដល់រាងកាយដូចជា វីតាមីន A វីតាមីន C និងបេតាការ៉ូទីន។ វាក៏ជាប្រភពដ៏ល្អនៃជាតិសរសៃ មានកាឡូរីទាប ស័ក្តិសមសម្រាប់អ្នកដែលគិតគូរពីសុខភាព។ មិនថាយកធ្វើជាម្ហូបឬ បង្អែមទេ គឺផ្អែមឆ្ងាញ់ហើយល្អសម្រាប់រាងកាយ។ ថ្ងៃនេះយើងនឹងលើកពីអត្ថប្រយោជន៍ ៥យ៉ាងរបស់ផ្លែល្ពៅមកជម្រាបជូនលោកអ្នក។

១. ជួយជំរុញប្រព័ន្ធរំលាយអាហារ

 ល្ពៅសម្បូរទៅដោយជាតិសរសៃអាហារដែលជួយជំរុញប្រព័ន្ធរំលាយអាហារធ្វើឱ្យចលនាពោះវៀនមានលក្ខណៈធម្មតា។ ការទទួលទានល្ពៅជាទៀងទាត់ជួយឱ្យប្រព័ន្ធរំលាយអាហារដំណើរការកាន់តែមានប្រសិទ្ធភាព។ វាអាចកាត់បន្ថយភាពមិនស្រួលបានយ៉ាងខ្លាំងដែលបណ្តាលមកពីចលនាពោះវៀនមិនស្រួល។

២. ថែរក្សាភ្នែក

 ល្ពៅគឺជាប្រភពដ៏សម្បូរបែប បេតាការ៉ូទីន ដែលរាងកាយអាចបំប្លែងទៅជាវីតាមីន A យ៉ាងមានប្រសិទ្ធភាព។ វីតាមីន A នេះមានតួនាទីសំខាន់ក្នុងការថែរក្សាភ្នែក ជួយការពារការចុះខ្សោយនៃកែវភ្នែក វាក៏ជួយកាត់បន្ថយហានិភ័យនៃជំងឺភ្នែកផងដែរ។

៣. ជួយកែលម្អអារម្មណ៍

 គ្រាប់ល្ពៅគឺជាប្រភពដ៏ល្អនៃអាស៊ីតអាមីណូ tryptophan ដែលជួយជំរុញការផលិត serotonin ដែលជាសារធាតុបញ្ជូនសរសៃប្រសាទដែលដើរតួនាទីគ្រប់គ្រងអារម្មណ៍ ជួយកាត់បន្ថយភាពតានតឹង ពង្រឹងការសំរាកលំហែ ហើយវាជួយធ្វើអោយអារម្មណ៍របស់អ្នកប្រសើរឡើង។

៤. ជួយបំប៉នសរសៃប្រសាទ

 ប្រេងគ្រាប់ល្ពៅសម្បូរទៅដោយអាស៊ីតខ្លាញ់សំខាន់ៗដូចជា Omega-៣ និង Omega-៦ ដែលមានសារៈសំខាន់សម្រាប់ការពង្រឹង និងថែរក្សាប្រព័ន្ធប្រសាទ។ ដូច្នេះការទទួលទានប្រេងគ្រាប់ល្ពៅអាចជួយឱ្យខួរក្បាលដំណើរការប្រកបដោយប្រសិទ្ធភាព និងលើកកម្ពស់សុខភាពសរសៃប្រសាទរយៈពេលវែង។

៥.ជួយគ្រប់គ្រងជាតិស្ករក្នុងឈាម

ល្ពៅមានសារធាតុប្រឆាំងអុកស៊ីតកម្ម ដែលអាចជួយគ្រប់គ្រងកម្រិតជាតិស្ករក្នុងឈាម។ ជាពិសេសចំពោះអ្នកជំងឺទឹកនោមផ្អែមប្រភេទទី ២ ការទទួលទានល្ពៅក្នុងកម្រិតមធ្យមអាចជួយកាត់បន្ថយការកើនឡើងនៃជាតិស្ករក្នុងឈាមបន្ទាប់ពីទទួលទានអាហាររួច ទោះជាយ៉ាងណាក៏ដោយ បរិមាណដែលទទួលទានគួរតែកុំច្រើនពេក ដើម្បីចៀសវាងការទទួលទានកាបូអ៊ីដ្រាតច្រើនជាងការចាំបាច់។

 ល្ពៅពិតជាល្អ និងសម្បូរទៅដោយវីតាមីន និងសារធាតុរ៉ែដែលមានសារៈសំខាន់សម្រាប់រាងកាយ លើសពីនេះល្ពៅក៏ជួយបន្ថែមអាហារូបត្ថម្ភដល់មុខម្ហូបផ្សេងៗផងដែរ។ ហើយវាផ្តល់អត្ថប្រយោជន៍ច្រើនដល់សុខភាព ប៉ុន្តែកុំភ្លេចប្រយ័ត្នក្នុងការទទួលទានក្នុងបរិមាណត្រឹមត្រូវក្នុងមួយថ្ងៃ ដើម្បីឱ្យយើងអាចទទួលបានអត្ថប្រយោជន៍ពេញលេញនៃល្ពៅដោយមិនចាំបាច់លើសពីបរិមាណចាំបាច់៕