ប្រាកដណាស់មនុស្សប្រុសស្រីគ្រប់រូបតែងតែប្រាថ្នាចង់បាននូវរាងស្អាតសមសួន ដោយគ្រប់គ្នាគិតថាត្រឹមតែការតមអាហារ និងហាត់ប្រាណអាចជួយឲ្យយើងអាចស្រកទំងន់បានតែការគិតបែបនេះមិនពិតទាំងស្រុងនោះទេ ព្រោះនូវមានកត្ដាផ្សេងៗទៀតដែលយើងមិនបានដឹងហើយបានធ្វើកំហុសទាំងនេះដដែលៗអាចធ្វើឲ្យយើងមិនអាចស្រកទំងន់បាន។

នេះបើយោងតាមផេកផ្លូវការ វេជ្ជបណ្ឌិត កម្ពុជា បានលើកឡើងពីកំហុសចំនួន៧ ចំនុចដែលយើងមើលរំលងធ្វើឲ្យមិនអាចស្រកទំងន់បានជោគជ័យមានដូចជា៖

១ ៖ ញាំប្រូតេអ៊ីនមិនគ្រប់គ្រាន់

នៅក្នុងអាហារមួយពេលៗ ត្រូវមានសារជាតិប្រូតេអ៊ីនដូចជា សាច់គោ ទ្រូងមាន់ ពងមាន់ ឬម្សៅប្រូតេអ៊ីន ហើយត្រូវប្រាកដថាអាហារដែលយើងញាំគឺមិនមានជាតិខ្លាញ់ ជាតិប្រៃ និងជាតិផ្អែម។ ប្រូតេអ៊ីនអាចជួយបង្កើតសាច់ដុំអោយសាច់យើងហាប់ណែន ម្យ៉ាងទៀតសារជាតិប្រូតេអ៊ីនធ្វើអោយយើងមិនសូវឃ្លាន ដែលជួយអោយយើងញាំតិចជាងមុន។ 

២៖ ផឹកទឹកភេសជ្ជៈច្រើនមុខ

ត្រូវចាំថាជាតិទឹកដែលល្អជាងគេសំរាប់រាងកាយរបស់យើងនោះគឺ ទឹកធម្មតា។ ប្រាកដហើយថាយើងអាចញាំកាហេ្វ ភេសជ្ជះផ្សេងៗ ទឹកដោះគោ តែយើងមិនគួរញាំរបស់ទាំងនោះច្រើនពេកទេ។ មានតែទឹកធម្មតាទេ ដែលមិនមានកាឡូរីដែលធ្វើអោយយើងឡើងទំងន់បាន។

៣៖ មិនយល់ដឹងពីកាឡូរី 

កាឡូរី Calorie គឺជាសារជាតិគ្រប់គ្រងទំងន់របស់យើង ញាំកាឡូរីច្រើន ទំងន់ឡើងច្រើន ញាំជាតិកាឡូរីតិចធ្វើអោយស្រកទំងន់។ គ្រប់អាហារទាំងអស់រួមទាំងបន្លែគឺសុទ្ធតែមានកាឡូរី គ្រាន់អាហារខ្លះមានតិច ខ្លះមានច្រើន មានតែទឹកសាបទេដែលគ្មានកាឡូរី។ សរុបមកយើងត្រូវយើងជ្រើសរើសញាំអាហារណាដែលមានជាតិកាឡូរីទាប ទើបទំងន់របស់យើងអាចស្រកបាន។

៤៖ ហាត់ប្រាណមិនគ្រប់គ្រាន់

ការហាត់ប្រាណគឺជាផ្នែកមួយដ៏សំខាន់ក្នុងការដុតកាឡូរី ក៏ដូចជាដុតជាតិខ្លាញ់ចេញពីក្នុងរាងកាយរបស់យើង មិនតែប៉ុណ្ណោះការហាត់ប្រាណក៏ធ្វើអោយរាងកាយយើងមាំមួនទៀតផង យើងគួរហាត់ប្រាណអោយបានយ៉ាងតិច30នាទី ក្នុងមួយថ្ងៃ និង4 ទៅ 5 ថ្ងៃក្នុងមួយសប្តាហ៍។ 

៥÷ មិនមានគ្រូបង្វឹកណែនាំ

ការហាត់ដោយខ្លួនឯង ដោយមិនដឹងពីក្បួនខ្នាតត្រឹមត្រូវនៃលំហាត់ប្រាណ​ និងមិនទាន់យល់ពីរបបអាហារ អាចធ្វើអោយយើងខាតពេលច្រើន​ និងមិនទទួលបានលទ្ធផល។ 

៦៖ ស្រេ្តសច្រើន

ទោះបីជាយើងហាត់ប្រាណគ្រប់គ្រាន់ គ្រប់គ្រង់របបអាហារបានល្អ តែបើជារៀងរាល់ថ្ងៃយើងមានការស្ត្រេសច្រើន វានឹងធ្វើអោយយើងប្រព័ន្ធដុតជាតិខ្លាញ់របស់យើងដំណើរការមិនល្អនោះទេ។ ដើម្បីកាត់បន្ថយភាពស្ត្រេសនេះ យើងអាចហាត់យូហ្គា (yoga) , អានសៀវភៅ, មើលរឿងកំប្លែង និងធ្វើសមាធិអោយបានទៀងទាត់។

៧៖ គេងមិនគ្រប់គ្រាន់

យើងដឹងហើយថារាងកាយរបស់យើងដុតជាតិខ្លាញ់ខ្លាំងនៅពេលដែលយើងគេង ដូច្នេះបើសិនជាយើងគេងមិនគ្រប់គ្រាន់ទេរាងកាយយើងមិនអាចដុតជាតិខ្លាញ់បានល្អនោះទេ។ យើងគួរគេងអោយបាន 6-8ម៉ោង ជារៀងរាល់ថ្ងៃ៕