ទីផ្សារបក្សីនៅទីក្រុងញូវយ៉កបានសម្រុកលក់ចេញមាន់ទាំងអស់របស់ពួកគេនិងហ្វូងសត្វផ្សេងទៀតកាលពីថ្ងៃសុក្របន្ទាប់ពីមានករណីជំងឺផ្តាសាយបក្សីចំនួន ៧ ត្រូវបានរកឃើញហើយអាជ្ញាធរបានបញ្ជាឲ្យទីផ្សារក្នុងតំបន់ទីក្រុងបិទរយៈពេលមួយសប្តាហ៍។

អភិបាលក្រុងញូវយ៉កលោកស្រី Kathy Hochul បាននិយាយថា មិនមានការគំរាមកំហែងភ្លាមៗចំពោះសុខភាពសាធារណៈទេ ហើយការបិទជាបណ្តោះអាសន្ននៃទីផ្សារបក្សីនៅក្នុងទីក្រុង និងតំបន់ Westchester County និងជាយក្រុង Long Island កើតឡើងដោយការប្រុងប្រយ័ត្នច្រើន។

ជំងឺគ្រុនផ្តាសាយបក្សីបានវាយប្រហារកសិដ្ឋានទូទាំងប្រទេស ដែលនាំទៅដល់ការសម្លាប់សត្វស្លាបរាប់លានក្បាល និងជំរុញឲ្យតម្លៃស៊ុតឡើងថ្លៃ ទោះបីជាក្រុមមន្ត្រីនិយាយថា គ្មានករណីណាមួយត្រូវបានរកឃើញក្នុងចំណោមមនុស្សនៅក្នុងទីក្រុងញូវយ៉កក៏ដោយ។

មជ្ឈមណ្ឌលគ្រប់គ្រង និងការពារជំងឺរបស់សហរដ្ឋអាមេរិក បាននិយាយថា មេរោគនេះបង្កហានិភ័យទាបដល់សាធារណជនទូទៅ។ ទីភ្នាក់ងារនេះបាននិយាយថា មានករណីឆ្លងជំងឺគ្រុនផ្តាសាយបក្សីលើមនុស្សចំនួន ៦៧ ករណីនៅក្នុងសហរដ្ឋអាមេរិក ជាមួយនឹងជំងឺស្រាល ហើយភាគច្រើនត្រូវបានរកឃើញក្នុងចំណោមកម្មករកសិដ្ឋានដែលត្រូវបានប៉ះពាល់នឹងបសុបក្សីឈឺ ឬគោទឹកដោះគោ៕