បើយោងតាមការបង្ហោះលើផេកក្លឹបបាល់ទាត់វិសាខា (Visakha Academy) បានលើកឡើងថា នេះគឺជាកម្រងរូបភាពអនុស្សាវរីយ៍ នៃការចុះកិច្ចសន្យាជាផ្លូវការរវាងលោក មាស ចាន់ណា នាយកបច្ចេកទេសក្លឹបរបស់យើង និងយុវជន រឹម សុខហ៊ាទ្រី ហៅ «អាតួ»  ។ ពួកយើងទាំងអស់គ្នា សូមជូនពរ «អាតួ» ទទួលបានជោគជ័យ និងសម្រេចនូវក្ដីស្រមៃក្នុងអាជីពបាល់ទាត់របស់ខ្លួននាថ្ងៃអនាគត។

យ៉ាងណាមិញកាលពីពេលថ្មីៗនេះ ក្រុមបាល់ទាត់ផ្ការីកគ្រប់រដូវ បានប្រកាសកិច្ចសហការជាមួយ ក្លឹបបាល់ទាត់វិសាខា ក្នុងការផ្លាស់ប្ដូរបច្ចេកទេសគ្រូ និងយុវជន ព្រមទាំងការងារមួយចំនួនទៀត ដើម្បីរួមចំណែកបណ្ដុះបណ្ដាល និងអភិវឌ្ឍន៍ធនធានយុវជនបន្ដវេនក្នុងវិស័យកីឡាបាល់ទាត់កម្ពុជាឱ្យកាន់តែរីកចំរើន។

យ៉ាងណាមិញ ការចុះ MOU លើកិច្ចសហការនេះធ្វើឡើងក្រោមវត្តមានកញ្ញា អ៊ូ បញ្ញាសុកិត្យា នាយិកាគ្រប់គ្រងក្លឹបវិសាខា និងលោក ចែម ចាន់ដារ៉ា ហៅនាយពាក់មី ប្រធានក្រុមបាល់ទាត់ផ្ការីកគ្រប់រដូវ នៅកីឡដ្ឋានព្រីនស៍៕