លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈបានអញ្ជើញប្រកាសបើកមហោស្រពភាពយន្តអន្តរជាតិកម្ពុជាលើកទី១៤ នៅសាលសន្និសីទចតុម្មុខ ខណៈមហោស្រពនេះមានស្នាដៃភាពយន្តជាតិអន្តរជាតិចំនួន១៥១ មកពី៤១ប្រទេសបានចូលរួមចាក់បញ្ចាំងជូនទស្សនាដោយសេរីរយៈពេល ៩ថ្ងៃចាប់ពីថ្ងៃទី២១ ខែមីនាតទៅ។

ថ្លែងក្នុងពិធីបើកដែលមានការចូលរួមពីសំណាក់ឯកឧត្ដម លោកជំទាវតំណាងក្រសួងស្ថាប័ន ឯកអគ្គរាជទូត ឯកអគ្គរដ្ឋទូត ផលិតករ សិល្បៈករជាតិ-អន្តរជាតិប្រមាណ៦០០នាក់នោះ លោកជំទាវបណ្ឌិតសភាចារ្យ ភឿង សកុណា បានមានប្រសាសន៍ថា តាមរយៈកិច្ចខិតខំប្រឹងប្រែងរបស់កុ្រមការងារទាំងអស់ ក៏ដូចជាគាំទ្រនិងការចូលរួម សហការពីដៃគូពាក់ព័ន្ធនានាឆ្នាំនេះគឺជាឆ្នាំទី១៤ដែលមហោស្រពភាពយន្តអន្តរជាតិកម្ពុជារៀបចំឡើង ហើយបានក្លាយជាព្រឹត្តិការណ៍ភាពយន្តដ៏ធំបំផុតក្នុងប្រទេស និងតំបន់អាស៊ាន។

លោកជំទាវបានបន្តថា ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត រាជរដ្ឋាភិបាលកម្ពុជាបានដាក់ចេញនូវការលើកទឹកចិត្តផ្នែក សារពើពន្ធ សំខាន់ៗ ដើម្បីទាក់ទាញផលិតករ ភាពយន្តអន្តរជាតិ មកថតនៅកម្ពុជា និងក្រោមចក្ខុវិស័យស្តីពីតួនាទី របស់ឧស្សាហកម្មភាពយន្តក្នុងការលើកកម្ពស់វប្បធម៌ កំណើនសេដ្ឋកិច្ច និងទេសចរណ៍។

សូមបញ្ជាក់ជូនថា មហោស្រពភាពយន្តអន្តរជាតិកម្ពុជាលើកទី១៤ សហការរៀបចំដោយនាយកដ្ឋានសិល្បៈភាពយន្ត និងផ្សព្វផ្សាយវប្បធម៌ មជ្ឈមណ្ឌលធនធានសោតទស្សន៍បុប្ផាណា និងមជ្ឈមណ្ឌលបណ្តុះ បណ្តាលជំនាញនិងទទួលការថតភាពយន្ត បរទេស(CFC) នឹងប្រារព្ធចាប់ពីថ្ងៃទី២១ ដល់ថ្ងៃទី២៩ ខែមីនា ឆ្នាំ២០២៥ ដោយស្នាដៃភាពយន្តជាតិអន្តរជាតិចំនួន ១៥១ មកពី៤១ប្រទេសបានចូលរួមចាក់បញ្ចាំងជូនទស្សនាដោយសេរី៕