ប្រធានមន្ទីរស្រាវជ្រាវ និងបង្រ្កាបបទល្មើសនៃកងរាជអាវុធហត្ថខេត្តបាត់ដំបង លោកវរសេនីយ៍ទោ សូ ឌី នាព្រឹកថ្ងៃទី២៤ ខែមីនា ឆ្នាំ២០២៥ នេះបានបញ្ជាក់ថាកម្លាំងជំនាញរបស់កងរាជអាវុធហត្ថខេត្តបាត់ដំបង បាននិងកំពុងចាត់ការតាមនីតិវិធីច្បាប់ ពាក់ព័ន្ធនឹងករណីការចុះបង្រ្កាបទីតាំងកែច្នៃរថយន្ត ដាប់លេខរថយន្ត នឹងនាំចូលរថយន្តខុសច្បាប់របស់ជនជាតិចិននៅស្រុករតនមណ្ឌល។ 

សូមរម្លឹកថា កាលថ្ងៃទី២២ ខែមីនា ឆ្នាំ២០២៥ កម្លាំងជំនាញបានចុះត្រួតពិនិត្យទីតាំងកែច្នៃរថយន្ត ដាប់លេខរថយន្ត និងនាំចូលរថយន្តចង្កូតស្តាំគ្មានពន្ធ០១កន្លែង ស្ថិតនៅភូមិបឹងអំពិល ឃុំស្តៅ ស្រុករតនមណ្ឌល ខេត្តបាត់ដំបង ដែលមានម្ចាស់ឈ្មោះ លី យ៉ុងកួយ ភេទប្រុស ជនជាតិចិន អាយុ៥៥ឆ្នាំ និងអ្នកតំណាងឈ្មោះ វ៉ាន់ សុជាតា ភេទស្រី អាយុ៣៣ឆ្នាំ ដែលមានតួនាទីខាងគណនេយ្យ ទីលំនៅក្នុងភូមិព្រែកនរិន្ទ ឃុំព្រែកនរិន្ទ ស្រុកឯកភ្នំ ខេត្តបាត់ដំបង។

ក្នុងប្រតិបត្តិការនេះសមត្ថកិច្ចកងរាជអាវុធហត្ថខេត្តបាត់ដំបងបានត្រួតពិនិត្យ និងរកឃើញវត្ថុតាងមួយចំនួនរួមមាន៖ ក្បាលរថយន្តសណ្តោងចង្កូតស្ដាំ គ្មានពន្ធចំនួន១៤គ្រឿង, រថយន្តទេសចរណ៍ចម្រុះចង្កូតស្តាំគ្មានពន្ធចំនួន១០គ្រឿង, រឺម៉កសណ្តោងនៃរថយន្តចំនួន២គ្រឿង, សាមីរឺម៉កចំនួន៤គ្រឿង ដែលត្រូវប្រគល់ជូនគយ និងរដ្ឋាករចាត់ការតាមនិតិវិធី។ បន្ថែមពីនេះក៏មានឈើប្រភេទគគីរ សុក្រំ បេង ចំនួន៣២៤សន្លឹក ស្មើនឹង១១ម៉ែត្រគីប ដែលត្រូវប្រគល់ឱ្យសមត្ថកិច្ចខ័ណ្ឌរដ្ឋបាលព្រៃឈើ។ លើសពីនេះទៀតក៏រឹបអូសបានឧបករណ៍សម្រាប់ដាប់លេខតួរថយន្តចំនួន១ឈុត និងកំព្យូរទ័រ ចំនួន០២គ្រឿង យកមករក្សាទុកនៅបញ្ជាការដ្ឋានកងរាជអាវុធហត្ថខេត្តបាត់ដំបង ដើម្បីកសាងសំណុំរឿងតាមនីតិវិធីផងដែរ៕