អភិបាលរងខេត្តសៀមរាប បានណែនាំដល់ប្រជានេសាទទាំងអស់ ត្រូវបញ្ឈប់ជាបន្ទាន់នូវការប្រើប្រាស់នូវឧបករណ៍ខុសច្បាប់ និងងាកមកប្រើប្រាស់ឧបករណ៍ដែលស្របតាមច្បាប់កំណត់ ដើម្បីកុំឱ្យខាតបង់ផលប្រយោជន៍ ក៏ដូចជារក្សាបាននូវធនធានធម្មជាតិនៅក្នុងតំបន់បឹងទន្លេសាបឱ្យបានគង់វង្សបន្ដទៅមុខ។

នេះបើតាមការលើកឡើងរបស់ ​ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម និង លោក អ៊ឹង គឹមលាង អភិបាលរងខេត្តសៀមរាប រួមនឹងវត្តមានថ្នាក់ដឹកនាំមន្ទីរអង្គភាព មន្ត្រីពាក់ព័ន្ធ អាជ្ញាធរមូលដ្ឋាន និងបងប្អូនប្រជានេសាទជាច្រើននាក់ នៅថ្ងៃទី២៧ ខែមីនា ឆ្នាំ២០២៥នេះ។

លោក អ៊ឹង គឹមលាង បានលើកឡើងថា «អាជ្ញាធរមូលដ្ឋាន មិនចង់ឃើញប្រជាពលរដ្ឋរបស់ខ្លួនមានភាពលំបាកនោះទេ តែប្រសិនបើប្រជាពលរដ្ឋប្រព្រឹត្តិបទល្មើសខុសច្បាប់ នោះអាជ្ញាធរនឹងអនុវត្ដទៅតាមផ្លូវច្បាប់ដូចគ្នាដោយគ្មានការលើកលែងឡើយ»។

ស្របពេលដែល ឯកឧត្តម ប៉ែន ផល្លីកា មានបញ្ជាក់ថា «តាមការសង្កេតកន្លងមក ការនេសាទមានភាពមិនប្រក្រតីច្រើន ហើយប្រជានេសាទមួយចំនួនមិនបានគិតគូរពីធនធានធម្មជាតិឡើយ។ ដូច្នេះសូមឱ្យអាជ្ញាធរមានសមត្ថកិច្ចទាំងអស់ ត្រូវកំណត់ឱ្យបាននូវមុខសញ្ញាជនល្មើសដែលប្រើប្រាស់ឧបករណ៍នេសាទខុសច្បាប់ ព្រោះសកម្មភាពនេះជាការបំផ្លាញធនធានធម្មជាតិមួយយ៉ាងធ្ងន់ធ្ងរ»។

គួរបញ្ជាក់ផងដែរថា រាជរដ្ឋាភិបាលនីតិកាលទី៧ បានដាក់ចេញនូវគោលនយោបាយជាតិ ដើម្បីអភិរក្សធនធានធម្មជាតិ ធនធានជលផលនៅក្នុងបឹងទន្លេសាប។ ក្រៅពីការទទួលខុសត្រូវពីស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ រួមទាំងកងកម្លាំងទាំងអស់ ក៏មានតួនាទីក្នុងការជួយសហការទប់ស្កាត់បទល្មើសនេសាទ បង្ក្រាបបទល្មើសជលផល និងជួយផ្សព្វផ្សាយពីច្បាប់ស្ដីពីជលផល ដើម្បីឱ្យប្រជានេសាទយើងទទួលបានផល និងជួយអភិរក្សធនធានធម្មជាតិសម្រាប់ទៅថ្ងៃអនាគតផងដែរ៕