ចំនួនអ្នកស្លាប់ដោយសារការរញ្ជួយដីដ៏ធំដែលបានវាយប្រហារប្រទេសមីយ៉ាន់ម៉ា និងប្រទេសថៃបានឡើងដល់ ៧០០ នាក់នៅថ្ងៃសៅរ៍ (២៩ មីនា)នេះ ខណៈដែលក្រុមអ្នកជួយសង្គ្រោះបានជីកតាមគំនរបាក់បែកនៃអគារដែលបាក់រលំក្នុងការស្វែងរកអ្នករស់រានមានជីវិត។

ការរញ្ជួយដីកម្រិត ៧.៧ រ៉ិចទ័របានវាយប្រហារភាគពាយព្យនៃទីក្រុង Sagaing ភាគកណ្តាលនៃប្រទេសមីយ៉ាន់ម៉ានៅរសៀលថ្ងៃសុក្រ។ គ្រោះរញ្ជួយដីនេះបានបំផ្លាញអគារ ស្ពានបាក់រលំ និងផ្លូវថ្នល់ជាច្រើននៅទូទាំងប្រទេសមីយ៉ាន់ម៉ា ជាមួយនឹងការខូចខាតយ៉ាងធ្ងន់ធ្ងរដែលត្រូវបានរាយការណ៍នៅក្នុងទីក្រុងធំទីពីរគឺ Mandalay ។

របបយោធាដែលកំពុងកាន់អំណាចបាននិយាយនៅក្នុងសេចក្តីថ្លែងការណ៍មួយថា យ៉ាងហោចណាស់មនុស្ស ៦៩៤ នាក់បានស្លាប់ និងជិត ១,៧០០ នាក់បានរងរបួសនៅក្នុងតំបន់ Mandalay របស់ប្រទេសមីយ៉ាន់ម៉ា ដែលត្រូវបានគេជឿថាជាប្រទេសដែលរងផលប៉ះពាល់ខ្លាំងជាងគេ។

អ្នក​ស្លាប់​ប្រហែល​១០​នាក់​ទៀត​ត្រូវ​បាន​គេ​បញ្ជាក់​ក្នុង​ទីក្រុង​បាងកក។ ក្រុមអ្នកជួយសង្គ្រោះក្នុងរដ្ឋធានីថៃបានធ្វើការពេញមួយយប់ដើម្បីស្វែងរកកម្មករដែលជាប់នៅពេលដែលអគារខ្ពស់ ៣០ ជាន់ដែលកំពុងសាងសង់បានដួលរលំ៕