ប្រព័ន្ធផ្សព្វផ្សាយរដ្ឋបាននិយាយថា ប្រធានាធិបតីចិនលោក Xi Jinping បានផ្ញើសាររំលែកទុក្ខដល់ប្រមុខរបបយោធាមីយ៉ាន់ម៉ានៅថ្ងៃសៅរ៍នេះ បន្ទាប់ពីគ្រោះរញ្ជួយដីដ៏ខ្លាំងក្លាកាលពីថ្ងៃសុក្រ ខណៈតួលេខមនុស្សស្លាប់បានកើនឡើងដល់១០០២នាក់ និងរបួស២៣៧៦នាក់ ក្នុងរយៈពេលជិត២៤ម៉ោងចាប់តាំងពីរញ្ជួយដីកម្លាំង៧.៧រ៉ិចទ័រវាយប្រហារប្រទេសមីយ៉ាន់ម៉ា និងនៅក្នុងប្រទេសថៃដែលជាអ្នកជិតខាង។

លោក Xi បានសម្តែងការសោកស្ដាយយ៉ាងខ្លាំង ចំពោះការបំផ្លិចបំផ្លាញនេះ ហើយបាននិយាយថា ប្រទេសចិនមានឆន្ទៈក្នុងការផ្តល់ជំនួយចាំបាច់ដល់ប្រទេសមីយ៉ាន់ម៉ា ដើម្បីគាំទ្រប្រជាជននៅក្នុងតំបន់ដែលរងផលប៉ះពាល់នៅក្នុងសាររំលែកទុក្ខរបស់លោកទៅកាន់ប្រមុខរបបយោធា Min Aung Hlaing នេះបើយោងតាមទូរទស្សន៍រដ្ឋ CCTV។

គ្រោះរញ្ជួយដីនេះបានបំផ្លាញអគារ ស្ពានបាក់ស្រុត និងផ្លូវថ្នល់ជាច្រើននៅទូទាំងប្រទេសមីយ៉ាន់ម៉ា ជាមួយនឹងការខូចខាតយ៉ាងធ្ងន់ធ្ងរដែលត្រូវបានរាយការណ៍នៅក្នុងទីក្រុងធំទីពីរគឺ Mandalay ។ ក្រសួងគ្រប់គ្រងគ្រាអាសន្នរបស់ចិនបាននិយាយថា ប្រទេសចិនបានបញ្ជូនក្រុមអ្នកជួយសង្គ្រោះចំនួន ៨២ នាក់ទៅកាន់ប្រទេសមីយ៉ាន់ម៉ានៅថ្ងៃសៅរ៍ បន្ទាប់ពីលោក Min Aung Hlaing បានចេញសេចក្តីអំពាវនាវដ៏កម្រមួយសម្រាប់ជំនួយអន្តរជាតិ៕