ឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិកម្ពុជាបានគូសបញ្ជាក់ថា លោកស្រី Nimala Rawit ប្រធានសហព័ន្ធកីឡាបាល់បោះជនពិការពិភពលោកបានវាយតម្លៃខ្ពស់ថា កម្ពុជាបានកសាងប្រវត្តិសាស្ត្រថ្មីជូនដល់អាស៊ី ហើយជាប្រវត្តិសាស្ត្រដែលកម្ពុជារៀបចំឡើងជាលើកទី១នេះ ខណៈម្ចាស់ផ្ទះកម្ពុជាបានឈ្នះមេដាយ មាសទាំងពីរវិញ្ញាសាផ្នែកបុរស និងនារីតែម្តង។

ឯកឧត្តមបានបន្ថែមថា លោកស្រី Nimala Rawit ប្រធានសហព័ន្ធកីឡាបាល់បោះជនពិការពិភពលោក និងប្រតិភូ កីឡាករ កីឡាការិនីមកពីប្រទេសទាំងអស់ ក្នុងព្រឹត្តិការណ៍នេះបានកោតសរសើរ និងវាយតម្លៃខ្ពស់ចំពោះការរៀបចំធ្វើម្ចាស់ផ្ទះ ការប្រកួតកីឡាបាល់បោះជនពិការអាស៊ី លើកទី១ (1st ASIAN PARA Throwball Championship) ឆ្នាំ២០២៥ នៅកម្ពុជាដោយរលូន និងជោគជ័យ។

ឯកឧត្តមបានបន្ថែមថា ការរៀបចំមានរបៀប លំដាប់លំដោយ ហើយគំរូរៀបចំរបស់ម្ចាស់ផ្ទះកម្ពុជានឹងត្រូវបន្តទៅប្រទេសផ្សេងៗទៀត ដែលប្រទេសផ្សេងៗនឹងយកគំរូតាម។

លោកបានលើកឡើងយ៉ាងដូច្នេះថា៖ “លោកស្រី Nimala Rawit បានវាយតម្លៃខ្ពស់ថាកម្ពុជាបានកសាងប្រវត្តិសាស្ត្រថ្មីជូនដល់អាស៊ី ហើយជាប្រវត្តិសាស្ត្រដែលកម្ពុជារៀបចំឡើងជាលើកទី១ បើទោះជាមានការលំបាក ប៉ុន្តែយើងបានខិតខំប្រែងអស់ពីលទ្ធភាព។ ដូច្នេះកិច្ចសហការគ្រប់ភាគីពាក់ព័ន្ធ រួមទាំងអ្នកស្ម័គ្រចិត្ត”

ឯកឧត្តម យី វាសនា បានសង្កត់ធ្ងន់ទៀតថា ជាគោលដៅ គឺកម្ពុជានឹងត្រៀមខ្លួនចេញទៅប្រកួត នៅប្រទេសម៉ាឡេស៊ី ឆ្នាំ២០២៥ ដើម្បីការពារដំណែងម្ចាស់មេដាយមាសទាំង២វិញ្ញាសាក្រុមបុរស និងនារី ជាមួយនឹងក្តីសង្ឃឹមខ្ពស់ថា កម្ពុជានឹងអាចការពារមេដាយមាសបាន នៅឆ្នាំ២០២៦បាន ដោយសារតែការប្រកួតរបស់កម្ពុជាមានពិន្ទុលើក្រុមជម្រើសជាតិផ្សេងៗទៀតដាច់ឆ្ងាយ ខណៈសិតខ្លះកម្ពុជាឈ្នះក្នុងពិន្ទុ២៥ ទល់ ០៥។

អត្តពលិកបាល់បោះជនពិការ លោក ម៉ន យ៉ារ៉ាញ់ បានបង្ហាញអារម្មណ៍រំភើបរីករាយ ដែលសហព័ន្ធកីឡាបាល់បោះពិភពលោក បានរៀបចំអោយមានវិញ្ញាសារបាល់បោះជនពិការនេះឡើង ហើយវាក៍ជាមោទនៈភាពដែលអត្តពលិករូបនេះបានចូលរួមប្រជែងយកមេដាយជាមួយបណ្ដាប្រទេសផ្សេងៗ។

គួរបញ្ជាក់ថា ឆ្លងកាត់ការប្រកួតរយៈពេល២ថ្ងៃ ជាលទ្ធផលបច្ចេកទេស គឺម្ចាស់ផ្ទះកម្ពុជាដណ្តើមបានមេដាយមាសទាំង២វិញ្ញាសា ដោយវិញ្ញាសាផ្នែកបុរសក្រុម ចំណាត់ថ្នាក់លេខ១ មេដាយមាស កម្ពុជា លេខ២ ស្រីលង្កា និងលេខ៣ ឥណ្ឌា ខណៈវិញ្ញាសាក្រុមផ្នែកនារី ចំណាត់ថ្នាក់លេខ១ មេដាយមាស ក្រុមកម្ពុជា លេខ២ ថៃ និងលេខ៣ ឥណ្ឌា៕