នៅពេលដែលភ្លើងឆេះព្រៃដែលបានចាប់ផ្តើមនៅ Uiseong កាលពីថ្ងៃទី២២ ខែមីនា បានរាលដាលដល់ភូមិមួយនៅក្នុង Yeongdeok County អ្នកនេសាទឥណ្ឌូណេស៊ីម្នាក់បានក្លាយជាវីរបុរសដែលមិននឹកស្មានដល់ដោយគាត់បានធ្វើការ​ជាមួយ​មេ​ភូមិ​ក្នុង​តំបន់ ​រត់​កាត់​ភូមិ​ជួយ​ជម្លៀស​អ្នក​ស្រុក​រាប់​សិប​នាក់។

យោងតាមរបាយការណ៍របស់ News1 កាលពីថ្ងៃទី៣១ ខែមីនាបានឱ្យដឹងថា នៅពេលដែលភ្លើងឆេះព្រៃដែលបណ្តាលមកពីខ្យល់បក់ខ្លាំងបានទៅដល់ភូមិឆ្នេរសមុទ្រ Chuksan-myeon កាលពីថ្ងៃទី ២៥ ខែមីនា ជនជាតិឥណ្ឌូណេស៊ីអាយុ ៣១ ឆ្នាំលោកSugiyanto បានចូលរួមជាមួយមេភូមិ Yoo Myung Shin ក្នុងការជូនដំណឹងដល់អ្នកស្រុក និងណែនាំពួកគេទៅកាន់សុវត្ថិភាព។ នៅម៉ោងប្រហែល១១យប់ អ្នកទាំងពីរបានប្រញាប់ប្រញាល់ពីផ្ទះមួយទៅផ្ទះមួយ ហើយបានប្រាប់ឱ្យពួកគេជម្លៀសចេញដោយ​មាន​អ្នកស្រុក​ចាស់ជរា​ជាច្រើន​នាក់​តស៊ូ​រត់គេច គាត់​និង​មេភូមិ​បានអៀវ​ពួកគេ​លើ​ខ្នង ដោយ​រត់​ចម្ងាយ​ប្រហែល ៣០០ ម៉ែត្រ​ទៅ​ដល់​ផ្លូវបំបែក​ភូមិ​។

គួររំលឹកផងដែរថា លោក Sugiyanto មកពីប្រទេសឥណ្ឌូណេស៊ី បានធ្វើការនៅប្រទេសកូរ៉េជាអ្នកនេសាទអស់រយៈពេល ៨ឆ្នាំមកហើយ។ គាត់អាច​និយាយ​ភាសា​កូរ៉េ​បាន​យ៉ាងល្អ​​ក្នុង​ការ​ប្រាស្រ័យ​ទាក់ទង​ជាមួយ​អ្នក​ភូមិ និង​ចែករំលែក​ក្តី​ស្រឡាញ់​យ៉ាង​ជ្រាលជ្រៅ​ចំពោះ​សហគមន៍។ អ្នកភូមិ និងអ្នកប្រើប្រាស់បណ្តាញសង្គមកូរ៉េជាច្រើនបានសម្តែងការកោតសរសើរចំពោះទឹកចិត្តរបស់លោក Sugiyantoដែលបានជួយជម្លៀសអ្នកភូមិចេញពីភ្លើងឆេះព្រៃនេះ៕