តាមរយៈការអនុវត្តន៍កម្មវិធីអនាម័យ និងទឹកស្អាតរបស់អង្គការទស្សនៈពិភពលោក ជាមួយអាជ្ញាធរពាក់ព័ន្ធ ខេត្តបន្ទាយមានជ័យបានចូលរួមជាផ្លូវការក្នុងបញ្ជីខេត្តដែលបានសម្រេចគោលដៅបញ្ចប់ការបន្ទោបង់ពាសវាលពាសកាល (ODF) របស់កម្ពុជា ដែលជាការផ្លាស់ប្តូរដ៏សំខាន់សម្រាប់សុខភាពសាធារណៈ អនាម័យ និងសុខុមាលភាពសហគមន៍។

ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានសម្ដែងនូវការកោតសរសើរ និងវាយតម្លៃខ្ពស់ចំពោះការរីកចម្រើន និងសមិទ្ធផលនានា ដែលខេត្តបន្ទាយមានជ័យសម្រេចបាន នាពេលកន្លងមកលើគ្រប់វិស័យ ទាំងផ្នែកសន្តិសុខ សណ្តាប់ធ្នាប់ សេដ្ឋកិច្ច សង្គមកិច្ច និងវប្បធម៌ ជាពិសេសការផ្លាស់ប្តូរកម្រិតជីវភាពរស់នៅរបស់ប្រជាពលរដ្ឋកាន់តែមានភាពប្រសើរឡើង និងការកែលម្អលក្ខខណ្ឌនៃការរស់នៅ តាមរយៈការលើកកម្ពស់ការផ្តល់សេវាទឹកស្អាត និងអនាម័យដែលបានធ្វើឱ្យប្រជាពលរដ្ឋបានផ្លាស់ប្តូរទម្លាប់ពីការផឹកទឹកគ្មានសុវត្ថិភាព មកផឹកទឹកស្អាតជួយទ្រទ្រង់សុខភាព។

ឯកឧត្តមបានអំពាវនាវដល់រដ្ឋបាលខេត្ត និងគ្រប់ភាគីពាក់ព័ន្ធទាំងអស់ ឱ្យបន្តការចូលរួមលើការផ្គត់ផ្គង់ទឹក និងអនាម័យជនបទ ជាពិសេសគឺការរិះរកយន្តការរក្សានិរន្តរភាពខេត្ត ODF និងជំរុញការងារទៅសម្រេច ODF Plus នាពេលដ៏ខ្លីខាងមុខ។

លោក នង ដាវីត អ្នកជំនាញជាន់ខ្ពស់ផ្នែកទឹក អនាម័យ និងអនាម័យ (WASH) នៃអង្គការទស្សនៈពិភពលោកកម្ពុជាបានមានប្រសាសន៍ថា "បង្គន់អនាម័យមិនគ្រាន់តែជាហេដ្ឋារចនាសម្ព័ន្ធទេ វាជាផ្លូវឆ្ពោះទៅរកការអភិវឌ្ឍសុខភាព ការអប់រំ និងវឌ្ឍនភាពសង្គមរបស់ប្រជាជនកម្ពុជា"។

លោកបានបន្ថែមថា សមិទ្ធផលនេះរួមចំណែកដល់យុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា ដែលផ្តល់អាទិភាពដល់សុខភាពសាធារណៈ និងនិរន្តរភាពបរិស្ថាន។ តាមរយៈការកែលម្អអនាម័យ និងការទទួលបានទឹកស្អាត ផ្តើមពីការបញ្ចប់ការបន្ទោបង់ពាសវាលពាសកាលជួយការពារជំងឺ និងគាំទ្រអនាគតដែលមានសុខភាពល្អសម្រាប់ទាំងអស់គ្នា។

តាមរយៈកម្មវិធីអានាម័យទឹកស្អាតរបស់អង្គការទស្សនៈពិភពលោកក្នុងខេត្តបន្ទាយមានជ័យតែមួយ បង្គន់អនាម័យចំនួនជាង ៣.០៦៦ ត្រូវបានសាងសង់នៅតាមផ្ទះ សាលារៀន មណ្ឌលសុខភាព និងទីសាធារណៈ ដែលផ្តល់អត្ថប្រយោជន៍ដោយផ្ទាល់ដល់គ្រួសារចំនួនជាង ១៨៧.០០០គ្រួសារ ក្នុងភូមិចំនួន៦១២ ក្នុងនេះមានកុមារជាង ២៤៩.៧០០នាក់ ។

ដោយមានការសហការជាមួយរាជរដ្ឋាភិបាលកម្ពុជា មន្ទីរអភិវឌ្ឍន៍ជនបទខេត្ត និងអាជ្ញាធរស្រុក និងឃុំថ្នាក់មូលដ្ឋាន កម្មវិធី ទឹកស្អាតនិងអនាម័យ (WASH) របស់អង្គការទស្សនៈពិភពលោក បានផ្ដល់អត្ថប្រយោជន៍ដល់ខេត្តចំនួន៨ គឺខេត្តបន្ទាយមានជ័យ បាត់ដំបង កណ្តាល តាកែវ កំពង់ស្ពឺ កំពង់ឆ្នាំង កំពង់ធំ និងសៀមរាប សរុបប្រជាជនជាង ៩៩៥.០០០នាក់។

អ្នកគ្រូ សៀង គី ជាគ្រូបង្រៀនថ្នាក់ទី៤ នៅស្រុកភ្នំព្រឹក ខេត្តបន្ទាយមានជ័យ បានលើកឡើងថា លោកស្រីពិតជា សប្បាយចិត្ត និងមានសុខភាពល្អជាងមុន ហើយតាមរយៈការមានបង្គន់ស្អាតនៅសាលារៀនមានន័យថាសិស្សអាចរៀនដោយមិនមានការលំបាក ហើយមិនមានជំងឺរាករូសដូចមុន ។

សូមជម្រាបជូនថា គិតត្រឹមថ្ងៃនេះ មានរាជធានី ខេត្តចំនួន ១៨ហើយ ដែលទទួលបានជ័យលាភីបញ្ចប់ការបន្ទោបង់ពាលវាលពាលកាល ODF និង ODF+ ៕