បុរសអាយុ ៥១ ឆ្នាំម្នាក់ត្រូវបានចាប់ខ្លួនកាលពីថ្ងៃច័ន្ទពីបទក្លែងបន្លំថាប្រពន្ធមានផ្ទៃពោះរបស់គាត់ត្រូវបានជាប់នៅក្រោមបំណែកនៃអគារកម្ពស់៣០ជាន់ដួលរលំនៅប្រទេសថៃ​ដោយ​សារ​ការ​រញ្ជួយ​ដី​កាល​ពី​ថ្ងៃ​សុក្រសប្តាហ៍មុននោះ។

លោក Somnit Duangnet​ បាន​អះអាង​ថា ប្រពន្ធ​របស់​គាត់​ដែល​មាន​ផ្ទៃពោះ​បួន​ខែ​ហើយ។ គាត់បាននិយាយថាប្រពន្ធរបស់គាត់បានទាក់ទងគាត់ដោយនិយាយថាអាគារកំពុងរង្គោះរង្គើហើយគាត់បានបាត់ទំនាក់ទំនងជាមួយនាងតាំងពីពេលនោះមក។ គាត់​បាន​បន្ថែម​ថា គាត់​បាន​តាម​រក​ប្រពន្ធ​ទាំង​អស់​សង្ឃឹម បើ​ទោះ​បី​ជា​គេង​មិន​លក់ ដោយ​ទទូច​ថា គាត់​នៅ​តែ​មាន​សង្ឃឹម។

យ៉ាង​ណា​មិញ ទំព័រ​ហ្វេសប៊ុក​មួយ​ដែល​មាន​ឈ្មោះ​ថា «Big Kren» បាន​លាតត្រដាង​រឿង​នេះ​ដោយ​បង្ហាញ​ថា កូន​ស្រី​របស់ Somnit កំពុង​តាម​រក​គាត់ បន្ទាប់​ពី​នាង​បាន​ឃើញ​ដំណឹង​នេះ។ នាងមិនបានឃើញលោក Somnit អស់រយៈពេល ៨ ឆ្នាំមកហើយដោយបញ្ជាក់ថា គាត់បានបង្កបញ្ហាយ៉ាងខ្លាំងរហូតដល់ម្តាយរបស់នាងប្តឹងលែងលះ។

ប៉ូលិសបានចាប់ខ្លួនលោក Somnit ហើយនាំគាត់ទៅប៉ុស្តិ៍ប៉ូលិស Bang Sue ដើម្បីសាកសួរ។ ជាមួយគ្នានេះដែរ ស្ត្រីអាយុ ២៥ ឆ្នាំម្នាក់ដែលលោក Somnit ប្រើប្រាស់​កាត​អតីត​បុគ្គលិក​របស់​នាងក្លែងបន្លំនៅក្នុងរឿងប្រឌិតនោះ បានដាក់ពាក្យបណ្តឹងផងដែរ ដោយបញ្ជាក់ថាការកុហករបស់គាត់បានធ្វើឱ្យមានការភ្ញាក់ផ្អើលក្នុងចំណោមគ្រួសាររបស់នាង៕