អាជ្ញាធរខេត្តសៀមរាប បានបញ្ជាក់ថា គិតមកត្រឹមថ្ងៃនេះ សណ្ឋាគារ ផ្ទះសំណាក់ នៅតាមផ្លូវធំៗនៃក្រុងសៀមរាប ត្រូវបានភ្ញៀវកក់ទុកជាបណ្ដើរៗហើយ ខណៈអាជ្ញាធរអំពាវនាវកុំឱ្យមានការដំឡើងថ្លៃសេវា ក្នុងព្រឹត្តិការណ៍អង្គរសង្ក្រាន្ត នាថ្ងៃពិធីបុណ្យចូលឆ្នាំថ្មី ប្រពៃណីជាខ្មែរនាពេលខាងមុខ។ជាក់ស្តែង លោក ង៉ូវ សេងកាក់ អភិបាលរងខេត្តសៀមរាប បាននិយាយថា «ផ្ទះសំណាក់ និងសណ្ឋាគារខ្នាតតូច ខ្នាតមធ្យម នៅតាមដងផ្លូវធំៗ ចាប់ផ្តើមទទួលបានការកក់បន្ទប់ស្នាក់នៅស្ទើរតែពេញអស់ហើយ ប៉ុន្តែសម្រាប់សណ្ឋាគារ ផ្ទះសំណាក់ នៅតាមផ្លូវតូចៗ ឬកន្លែងជាយក្រុងដែលមិនសូវគេមើលឃើញ អាចនៅសល់បន្ទប់ខ្លះ»។ជាមួយគ្នានេះ លោកក៏បានសំណូមពរដល់ប្រតិបត្តិករទេសចរណ៍ ក៏ដូចជាម្ចាស់សណ្ឋាគារ ផ្ទះសំណាក់ទាំងអស់ ក្នុងខេត្តសៀមរាប សូមបន្តនិរន្តភាពរបស់ខ្លួនឱ្យបានល្អជូនអតិថិជន ដោយមិនដំឡើងថ្លៃសេវាណាមួយ រួមទាំងសេវាម្ហូបអាហារ ដែលធ្វើឱ្យប៉ះពាល់ដល់ភ្ញៀវទេសចរណ៍ដែលមកកំសាន្តក្នុងព្រឹត្តិការណ៍អង្គរសង្ក្រាន្ត នាថ្ងៃពិធីបុណ្យចូលឆ្នាំថ្មី ប្រពៃណីជាខ្មែរនាពេលខាងមុខ។

គួរបញ្ជាក់ផងដែរថា បើតាមរបាយការណ៍របស់មន្ទីរទេសចរណ៍ខេត្ត នៅខែមីនា ឆ្នាំ២០២៥នេះ ការធ្វើអាជីវកម្មទេសចរណ៍ ក្នុងខេត្តមានចំនួន ១,៤២៥កន្លែង ក្នុងនោះសណ្ឋាគារមានចំនួន ២២៤កន្លែង ស្មើនឹង ១៣,៥១៦បន្ទប់ សណ្ឋាគារបានដំណើរការមានចំនួន ១៨៣កន្លែង ស្មើនឹង ៩,៩០៧បន្ទប់។ ចំពោះផ្ទះសំណាក់ដែលកំពុងដំណើរការមានចំនួន ៣០២កន្លែង ស្មើនឹង ៤,៦៨១បន្ទប់ផងដែរ៕