វៀតណាមបានសម្តែងការសោកស្តាយចំពោះការសម្រេចចិត្តរបស់សហរដ្ឋអាមេរិកក្នុងការដាក់ពន្ធសងសឹក ហើយនឹងបន្តសម្របសម្រួលជាមួយសហរដ្ឋអាមេរិកដើម្បីស្វែងរកដំណោះស្រាយដែលធានាដល់ការអភិវឌ្ឍន៍ស្ថិរភាពនៃទំនាក់ទំនងសេដ្ឋកិច្ចទ្វេភាគី។

អ្នកនាំពាក្យក្រសួងការបរទេសវៀតណាម លោកស្រី Pham Thu Hang បាននិយាយនៅថ្ងៃសុក្រនេះថា វៀតណាមមានការសោកស្តាយចំពោះការសម្រេចចិត្តរបស់សហរដ្ឋអាមេរិកក្នុងការដំឡើងពន្ធសងសឹកលើការនាំចេញរបស់វៀតណាមទៅកាន់សហរដ្ឋអាមេរិក ។

លោកស្រីបានបន្ថែមថា យើងជឿជាក់ថាការសម្រេចចិត្តនេះគឺមិនស៊ីសង្វាក់គ្នានឹងការពិតនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មដែលមានផលប្រយោជន៍ទៅវិញទៅមករវាងប្រទេសទាំងពីរ។ វាមិនឆ្លុះបញ្ចាំងឱ្យឃើញច្បាស់អំពីស្មារតីនៃភាពជាដៃគូយុទ្ធសាស្ត្រគ្រប់ជ្រុងជ្រោយសម្រាប់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍន៍នោះទេ។ ប្រសិនបើអនុវត្តវានឹងជះឥទ្ធិពលអវិជ្ជមានដល់ទំនាក់ទំនងសេដ្ឋកិច្ច និងពាណិជ្ជកម្មទ្វេភាគី និងប៉ះពាល់ដល់ផលប្រយោជន៍របស់ប្រជាជន និងធុរកិច្ចនៃប្រទេសទាំងពីរ។

នាពេលថ្មីៗនេះ វៀតណាមបានចូលរួមក្នុងការផ្លាស់ប្តូរ និងពិភាក្សាយ៉ាងសកម្មជាមួយសហរដ្ឋអាមេរិក លើវិធានការជាក់លាក់សំដៅដោះស្រាយឧបសគ្គ ជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្មទ្វេភាគី និងបន្តស្វែងរកពាណិជ្ជកម្មដោយយុត្តិធម៌ និងនិរន្តរភាព ដែលស្របតាមផលប្រយោជន៍របស់ភាគីទាំងពីរ៕