ដើមខែមេសានេះការរៀបចំតុបតែង តាំងលម្អរក្នុងទីតាំងប្រារព្ធព្រឹត្តិការណ៍អង្គរសង្ក្រាន្ត នៅតំបន់អង្គរ និងក្រុងសៀមរាបក្រោមប្រធាបទ "ញញឹមសាទរសង្ក្រាន្តឆ្នាំថ្មី" សម្រេចបានប្រមាណ៨០ភាគរយហើយ។ 

យោងតាមការបញ្ជាក់នៅលើគណនីបណ្តាញសង្គមរបស់រដ្ឋបាលខេត្តសៀមរាប កាលពីម្សិលមិញបានឲ្យដឹងថា គិតមកដល់ថ្ងៃទី៤ ខែមេសា ឆ្នាំ២០២៥នេះ ក្រុមការងារបានរៀបចំ តុបតែង កែលម្អដោភ័ណភាព និងកន្លែងកម្សាន្តទាំងនៅតំបន់អង្គរ និងក្រុងសៀមរាបបានប្រមាណ ៨០ភាគរយ ដើម្បីទទួលបងប្អូនប្រជាពលរដ្ឋក្នុងខេត្ត ក៏ដូចជាភ្ញៀវទេសចរជាតិ អន្តរជាតិមកទស្សនាកម្សាន្តក្នុងព្រឹត្តិការណ៍អង្គរសង្ក្រាន្ត ឆ្នាំ២០២៥នេះ។ 

ជាមួយគ្នានេះរដ្ឋបាលខេត្តក៏បានគូសបញ្ជាក់ថាព្រឹត្តិការណ៍អង្គរសង្ក្រាន្ត ឆ្នាំ២០២៥ នឹងដំណើរការនាថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ ត្រូវរៀបចំឡើងនៅលើទីតាំងចំនួន៦ ដោយមានកម្មវិធីចំនួន ៣៨កម្មវិធី ដែលសុទ្ធសឹងជាកម្មវិធីដែលផ្ដល់ជូននូវភាពសប្បាយរីករាយដល់មហាគ្រួសារខ្មែរ ពិសេសយុវជន បានចូលរួមឈ្វេងយល់ពីមរតកវប្បធម៌ខ្មែរជាច្រើនទម្រង់ដែលត្រូវបានលើកយកមករំលេចនៅក្នុងកម្មវិធីនីមួយៗ ក្នុងគោលដៅបំផុសស្មារតីស្រលាញ់ និងលើកស្ទួយវប្បធម៌ជាតិថែមទៀងតផង៕