ខេត្តកំពង់ធំ ខិតខំពង្រឹងគុណភាពផលិតផលទេសចរណ៍ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ដែលប្រព្រឹត្តទៅនៅថ្ងៃទី១៤-១៦ខែមេសាឆ្នាំ២០២៥ ដោយសហការជាមួយអាជីវករ និង ប្រតិបត្តិករទេសចរណ៍ ក្នុងការពង្រឹងគុណភាពផលិតផល ទេសចរណ៍ ថែរក្សាបរិស្ថាន អនាម័យនិងរក្សាតម្លៃផលិតផលនិងសេវាឱ្យបានសមរម្យនិងមានការថែរក្សាសន្តិសុខសណ្ដាប់ធ្នាប់ប្រកបដោយសុវត្ថិភាពពីអាជ្ញាធរមូលដ្ឋាន។ នេះបើតាមការលើកឡើងរបស់ លោក សេង អាន ប្រធានមន្ទីរទេសចរណ៍ខេត្តកំពង់ធំ។

ជាមួយគ្នានេះ លោក ជា វ៉ាន់ចាន់ អភិបាលរងខេត្តកំពង់ធំ បានមានប្រសាសន៍ថា រដ្ឋបាលខេត្តកំពង់ធំ បានខិតខំជំរុញឱ្យមានការរៀបចំកែលម្អសោភណ្ឌភាពក្រុងស្ទឹងសែនដោយមានការតុបតែងភ្លើងពណ៌ក្នុងក្រុងតាមដងផ្លូវនិងដងស្ទឹងសែន មានដាំផ្កាតាមទ្រូងផ្លូវជាតិលេខ៦ ផ្សាររាត្រីលើឆ្នេខ្សាច់មាត់ស្ទឹង និងរៀបចំធ្វើសង្ក្រាន្តកំពង់ធំ ក្នុងឱកាសចូលឆ្នាំថ្មីប្រពៃណីជាតិខ្មែរនាពេលខាងមុខនេះ។

ក្រៅពីនេះក៏មានការរៀបចំកម្មវិធីជាច្រើន សម្រាប់ភ្ញៀវទេសចរណ៍មកលេងកម្សាន្តសង្ក្រាន្តកំពង់ធំ នៅតាមបណ្ដោយស្ទឹងសែន ដោយមានការដាក់ពង្រាយពាងទឹកជាច្រើន ការតាំងគោមផ្កាភ្ញី និងអំពូលភ្លើងចម្រុះពណ៌ ក្រមា មួកស្លឹកត្នោតផលិតផលក្នុងស្រុក ពស់យក្សតំណាងឱ្យឆ្នាំម្សាញ់ និងតំណាងឱ្យប្រវត្តិកំពង់ធំផងដែរ៕