អភិបាលខេត្តកំពង់ចាម លោក អ៊ុន ចាន់ដា សម្រេចបង្កើតព្រឹត្តិការណ៍ ដាក់បង្ហាញលៀសហាលកំពង់ចាម ប្រវែង ១ ០០០ម៉ែត្រ លៀសចំនួន ៣តោន នៅខាងមុខសាលាខេត្ត រហូតដល់វេទិកាអុំទូកមាត់ទន្លេ ក្រុងកំពង់ចាម ក្នុងឱកាសអបអរសាទរពិធីបុណ្យចូលឆ្នាំថ្មី។

លោក អ៊ុន ចាន់ដា បានបញ្ជាក់ថា អត្ថន័យលេខ ១,០០០ (លៀសហាល ១.០០០ម៉ែត្រ) នេះគឺនៅក្នុងអក្សរសាស្រ្តលេខ ១,០០០ ជាភាសាបាលី និងសំស្រ្កឹត មានន័យថា ‘’សហស្ស’’។ ហើយ អត្ថន័យ នៅក្នុងវប្បធម៌ ប្រពៃណី និងជីវភាពប្រចាំថ្ងៃ គាថាពាន់ (គាថាបាលីសុទ្ធ ចំនួន ១,០០០គាថា) មាននៅក្នុងរឿងព្រះវេស្សន្តរ៍ មានចំនួន ១៣កណ្ឌ។

លោកអភិបាលបានឲ្យដឹងទៀតថា លៀសហាល ជាអាហារ មួយប្រភេទ ដែលគេយកលៀសស្រស់ មកផ្សំជាមួយគ្រឿងផ្សំ ហើយយកទៅហាលពន្លឺថ្ងៃ ដើម្បីឲ្យឆ្អិន អាចបរិភោគបាន (សហស្សរង្សី ពន្លឺព្រះអាទិត្យ ឬពន្លឺថ្ងៃ) ពាក្យថា សហស្សរង្សី ក៏ជាប់ជាមួយនឹងលេខ ១,០០០ ដែរ។

ចំពោះ អត្ថន័យ នៅក្នុងការដឹកនាំគឺ មានការចូលរួមយ៉ាងច្រេីនលេីសលប់ សាមគ្គីភាព និងឯកភាពគ្នា។ ការដាក់បង្ហាញលៀសហាល ទំរង់ជាចំណងខ្សែជាប់គ្នា ចេញពីចុងខ្សែ២ ចងភ្ជាប់ជាចំណងតែមួយ។ ដែលខ្សែទី១ ជាចំណងឯកភាព និងខ្សែទី២ ជាចំណងសាមគ្គីភាព នាំមកនូវភាពសម្បូរសប្បាយ រីកចម្រើន រុងរឿងរាប់ពាន់ឆ្នាំ។

លៀសហាល ជាផលិតផលមួយប្រចាំខេត្តកំពង់ចាម ដែលមានរសជាតិឆា្ងញ់ ល្បីល្បាញ ខណៈមានអាជីវករតាមខេត្ត-ក្រុងនានាដែលដាក់លក់ក៏បានបញ្ជាក់ពីរសជាតិ និងឈ្មោះលៀសហាលកំពង់ចាមផងដែរ៕