អគ្គស្នងការរង និងជាស្នងការនគរបាលរាជធានីភ្នំពេញ ឯកឧត្តម ឧត្តមសេនីយ៍ឯក ជួន ណារិន្ទ អំពាវនាវឲ្យយុវជន យុវនារី និងប្រជាពលរដ្ឋ លេងកម្សាន្តសប្បាយតាមសង្ក្រាន្តនានាដោយសេចក្តីថ្លៃថ្នូរ និងគោរពគ្នា មិនត្រូវលេងសប្បាយជ្រុលរហូតឈានដល់ការប៉ះពាល់បំពានសិទ្ធិអ្នកដទៃ ឬឈានដល់ការកើតហិង្សា ដែលសមត្ថកិច្ចនឹងមានវិធានការច្បាប់ជាធរមាន ដោយមិនលើកលែង។

ឯកឧត្តម ឧត្តមសេនីយ៍ឯក ជួន ណារិន្ទ ថ្លែងដូចនេះក្នុងកិច្ចផ្តល់បទសម្ភាសន៍ដល់អ្នកសារព័ត៌មានក្នុងស្រុកស្តីពីផែនការកិច្ចការពារសន្តិសុខ រក្សាសណ្តាប់ធ្នាប់សុវត្ថិភាព ជូនភ្ញៀវទេសចរណ៍ជាតិ-អន្តរជាតិ និងប្រជាពលរដ្ឋទូទៅ ដែលអញ្ជើញមកលេងកម្សាន្តសប្បាយរីករាយនាថ្ងៃបុណ្យចូលឆ្នាំថ្មីប្រពៃណីខ្មែរឆ្នាំ២០២៥ នៅថ្ងៃទី០៧ ខែមេសា ឆ្នាំ២០២៥។

ឯកឧត្តមស្នងការថ្លែងថា៖«ការលេងសប្បាយនេះ កុំធ្វើឲ្យខ្លួនក្លាយជាជនសង្ស័យប្រព្រឹត្តិល្មើស ខ្ញុំគិតថាយើងលេងល្បែងប្រជាប្រិយដើម្បីការសប្បាយដូច្នេះត្រូវមានការអត់ឱនឲ្យគ្នា […] ត្រូវប្រើភាសា និងរក្សាភាពទន់ភ្លន់ជាកូនខ្មែរ អ្វីដែលលើសពីនេះសូមកុំឲ្យមានព្រោះអាចប៉ះពាល់សិទ្ធិអ្នកដទៃ»។

ទន្ទឹមនោះ ឯកឧត្តមស្នងការបានបញ្ជាក់ដែរថា រាល់ជនដែលបង្កហិង្សាដាក់គ្នា នៅតាមទីតាំងសប្បាយភាពផ្សេងៗ លេងជ្រុលហួសប៉ះពាល់គ្នារហូតកើតហិង្សា រកឃើញថាខុសគឺនឹងអនុវត្ត សមត្ថកិច្ចនឹងចាត់វិធានការតាមច្បាប់មិនលើកលែងឡើយ។

គួរឲ្យដឹងដែរថា ថ្ងៃបុណ្យចូលឆ្នាំថ្មីប្រពៃណីខ្មែរឆ្នាំ២០២៥ នៅរាជធានីភ្នំពេញ នឹងរៀបចំសង្រ្កាន្តវត្តភ្នំ និងតំបន់ថ្មើរជើង (walk street) ដោយឆ្នាំនេះរដ្ឋបាលរាជធានីភ្នំពេញ គ្រោងរៀបចំពិធីសង្រ្កាន្តវត្តភ្នំឲ្យមានភាពអធិកធមសប្បាយរីករាយជាងឆ្នាំមុន ហើយពង្រីកវិសាលភាពឲ្យកាន់តែទូលំទូលាយ ឲ្យមានការលំហូរសម្រាប់អ្នកមកលេងកម្សាន្តចេញចូលមានភាពងាយស្រួលដើម្បីកាត់បន្ថការកកស្ទះចរាចរណ៍ ខណៈដែលស្នងការដ្ឋាននគរបាលរាជធានីភ្នំពេញ និងត្រូវប្រើប្រាស់កម្លាំងជាង២ពាន់នាក់ បំពាក់ដោយមធ្យោបាយ សម្ភារគ្រប់គ្រាន់ សហការជាមួយអាជ្ញាធរ និងសមត្ថកិច្ចពាក់ព័ន្ធ ធ្វើយ៉ាងណាធានាឲ្យបានសុខសុវត្ថិភាព ជូន ភ្ញៀវទេសចរណ៍ជាតិ-អន្តរជាតិ និងប្រជាពលរដ្ឋទូទៅ៕