រដ្ឋាភិបាលកូរ៉េខាងត្បូងបានអនុម័តថ្ងៃទី ៣ ខែមិថុនា ខាងមុខជាកាលបរិច្ឆេទសម្រាប់ការបោះឆ្នោតជ្រើសរើសប្រធានាធិបតី បន្ទាប់ពីការដកតំណែងរបស់លោក Yoon Suk Yeol កាលពីសប្តាហ៍មុន ជុំវិញការប្រកាសច្បាប់អាជ្ញាសឹករយៈពេលខ្លី។

គណៈរដ្ឋមន្ត្រីបានយល់ព្រមលើកាលបរិច្ឆេទនៅថ្ងៃអង្គារនេះ បន្ទាប់ពីបានពិភាក្សាជាមួយគណៈកម្មាធិការជាតិរៀបចំការបោះឆ្នោត ដើម្បីអនុម័តថ្ងៃឈប់សម្រាកជាសាធារណៈសម្រាប់ការបោះឆ្នោត។ លោកYoon ត្រូវបានដកចេញដោយតុលាការធម្មនុញ្ញពីបទរំលោភលើកាតព្វកិច្ចផ្លូវការរបស់គាត់ដោយការចេញក្រឹត្យច្បាប់អាជ្ញាសឹកកាលពីថ្ងៃទី ៣ ខែធ្នូកន្លងទៅ និងការចល័តទ័ពនៅក្នុងការប៉ុនប៉ងដើម្បីបញ្ឈប់ដំណើរការសភា។

ច្បាប់​តម្រូវ​ឲ្យ​មាន​ការ​បោះ​ឆ្នោត​ប្រធានាធិបតី​ថ្មី​ក្នុង​រយៈ​ពេល ៦០ ថ្ងៃ ប្រសិន​បើ​តំណែង​នេះ​នៅ​ទំនេរ។ កូរ៉េខាងត្បូងបានប្រឈមមុខនឹងភាពចលាចលនយោបាយជាច្រើនខែចាប់តាំងពីលោក Yoon បានធ្វើឲ្យប្រទេសនេះស្រឡាំងកាំងដោយការប្រកាសច្បាប់អាជ្ញាសឹក ដែលបង្កឲ្យមានការចោទប្រកាន់របស់គាត់ដោយសភា និងការចោទប្រកាន់មេដឹកនាំស្តីទីនាយករដ្ឋមន្ត្រី Han Duck-sooផងដែរ ។

ការចោទប្រកាន់របស់លោក Han ក្រោយមកត្រូវបានលុបចោលដោយតុលាការធម្មនុញ្ញ ហើយលោកនឹងបន្តតួនាទីជាប្រធានាធិបតីស្តីទីរហូតដល់ការបោះឆ្នោត។ ភាពខ្វះចន្លោះនៃអំណាចនៅកំពូលនៃរដ្ឋាភិបាលកូរ៉េខាងត្បូងបានគ្របដណ្ដប់លើកិច្ចខិតខំប្រឹងប្រែងរបស់ទីក្រុងសេអ៊ូលក្នុងការដោះស្រាយជាមួយរដ្ឋបាលរបស់ប្រធានាធិបតីសហរដ្ឋអាមេរិក Donald Trump នៅពេលនៃការបង្កើនពន្ធរបស់សហរដ្ឋអាមេរិក និងការធ្លាក់ចុះនៃកំណើនសេដ្ឋកិច្ចធំបំផុតទីបួនរបស់អាស៊ី៕