រដ្ឋបាលរាជធានីភ្នំពេញ បានបញ្ចេញសេវាដឹកជញ្ជូនសាធារណៈរថយន្តក្រុង ដោយមិនបង់ប្រាក់ រយៈពេល ០៦ថ្ងៃ ចាប់ពីថ្ងៃទី១២ ដល់ ថ្ងៃទី១៧ ខែមេសា ឆ្នាំ២០២៥ ដោយយោងតាមប្រសាសន៍របស់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

នាព្រឹកថ្ងៃសៅរ៍ ទី១២ ខែមេសា ឆ្នាំ២០២៥នេះ រថយន្តក្រុងសាធារណៈ បានចាប់ផ្តើមដឹកជញ្ជូនអ្នកដំណើរដោយមិនយកប្រាក់ ចាប់ពីព្រឹកថ្ងៃទី១២ ខែមេសា ឆ្នាំ​២០២៥ ខណៈរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ហេង សួរ និងអភិបាលរាជធានីភ្នំពេញ ឯកឧត្តម ឃួង ស្រេង ក៏បានអញ្ជើញជូនដំណើរពលរដ្ឋឡើងរថយន្តផងដែរ។

ប្រជាពលរដ្ឋជាច្រើនបាននាំគ្នាចេញទៅស្រុកកំណើតតាមបណ្ដាខេត្តនានាតាំងពីព្រឹកព្រលឹមរង់ចាំប្រើប្រាស់មធ្យោបាយធ្វើដំណើរតាមរថយន្តក្រុងសាធារណៈឥតគិតថ្លៃរបស់រដ្ឋបាលខេត្តរាជធានីភ្នំពេញនៅតាមចំណតដែលរថយន្តក្រុងត្រូវធ្វើដំណើរចេញទៅ។

គួរឲ្យដឹងដែរថា រដ្ឋបាលរាជធានីភ្នំពេញ​ បានប្រើប្រាស់រថយន្តក្រុងសម្រាប់ដឹកប្រជាពលរដ្ឋទៅលេងស្រុកកំណើតក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ចំនួន​៥៩៧គ្រឿង ដើម្បីសន្សំសំចៃថវិកាជូនប្រជាពលរដ្ឋ និងកាត់បន្ថយបាននូវការឡើងថ្លៃរបស់រថយន្តដឹកអ្នកដំណើរឯកជន៕