រដ្ឋាភិបាលសាធារណរដ្ឋដូមីនីកបានចេញផ្សាយរបាយការណ៍មួយកាលពីថ្ងៃសុក្រ ស្តីពីការបាក់ស្រុតដំបូលដ៏គួរឲ្យរន្ធត់នៅឯក្លឹបរាត្រីមួយនៅដើមសប្តាហ៍នេះ ដែលបានបណ្តាលឲ្យមនុស្សស្លាប់កើនឡើងដល់ ២២១ នាក់។ របាយការណ៍នេះមិនបានបញ្ជាក់ពីមូលហេតុនៃសោកនាដកម្មនេះទេ ខណៈដែលក្រុមអ្នកជំនាញជាតិ និងអន្តរជាតិនឹងបន្តការស៊ើបអង្កេតលើការដួលរលំនេះ។ ការដួលរលំបានកើតឡើងភ្លាមៗបន្ទាប់ពីពាក់កណ្តាលអធ្រាត្រកាលពីថ្ងៃអង្គារនៅឯក្លឹបរាត្រី Jet Set អំឡុងពេលការប្រគុំតន្ត្រីដ៏ច្រើនកុះករដោយតារាចម្រៀង Merengue Rubby Perez ដែលតារារូបនេះក៏ស្ថិតក្នុងចំណោមជនរងគ្រោះដែលបានស្លាប់ផងដែរ។

បុគ្គលិកសង្គ្រោះបន្ទាន់ជាង៤,៥០០នាក់ត្រូវបានដាក់ពង្រាយទៅកាន់កន្លែងកើតហេតុ ដោយធ្វើការជិត ៥៩ ម៉ោងបន្ទាប់ពីសោកនាដកម្មនេះ ដើម្បីស្វែងរកសង្គ្រោះអ្នកនៅរស់ ស្វែងរកសពដែលជាប់ក្នុងក្លឹបរាត្រីនោះ។ សេវាសុខភាពជាតិបាននិយាយថា មនុស្សសរុបចំនួន ១៨៩ នាក់ត្រូវបានជួយសង្គ្រោះពីគំនរបាក់បែក ខណៈដែលមនុស្ស ១៧ នាក់នៅតែសម្រាកព្យាបាលនៅមន្ទីរពេទ្យ។

ខណៈដែលក្រុមគ្រួសារបន្តកាន់ទុក្ខដល់មនុស្សជាទីស្រលាញ់របស់ពួកគេ វិទ្យាស្ថានជាតិកោសល្យវិច្ច័យវិទ្យានៅតែធ្វើការកំណត់អត្តសញ្ញាណជនរងគ្រោះ និងប្រគល់សាកសពជូនសាច់ញាតិ។ ប្រធានាធិបតី Luis Abinader គ្រោងនឹងចូលរួមពិធីគោរពវិញ្ញាណក្ខន្ធនៅមជ្ឈមណ្ឌលកីឡា Polideportivo De Haina នៅថ្ងៃអាទិត្យនេះ ដែលជាថ្ងៃចុងក្រោយនៃរយៈពេលកាន់ទុក្ខជាតិ៕