អគ្គលេខាធិការដ្ឋានអាជ្ញាធរប្រយុទ្ធប្រឆាំងគ្រឿងញៀន និងគណ:កម្មាធិការត្រួតពិនិត្យគ្រឿងញៀនរាជធានីភ្នំពេញ រួមគ្នាផ្សព្វផ្សាយពីបញ្ហាគ្រឿងញៀនដល់ប្រជាពលរដ្ឋទៅលេងស្រុកកំណើតនៅចំណតរថយន្តក្រុងរបស់រដ្ឋបាលរាជធានីភ្នំពេញរង្វង់មូលនាងមច្ឆា គល់ស្ពានជ្រោយចង្វារ និងឬស្សីកែវ នៅព្រឹកថ្ងៃទី១២ ខែមេសា ឆ្នាំ២០២៥។ ក្នុងឱកាសនោះដែរ ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយអប់រំ និងទំនាក់ទំនងសាធារណៈនៃអាជ្ញាធរជាតិប្រយុទ្ធប្រឆាំងគ្រឿងញៀន បានឲ្យដឹងថា អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានធ្វើកិច្ចសហការជាមួយនឹងគណៈកម្មាធិការត្រួតពិនិត្យគ្រឿងញៀនរាជធានីភ្នំពេញ សហការផ្សព្វផ្សាយនៅក្នុង កម្មវិធីមួយចំនួន មានដូចជា៖ ១.ការផ្ញើសារអប់រំពីបញ្ហាគ្រឿងញៀនក្នុងពិធីប្រគុំតន្ត្រី រាំកម្សាន្ត, ២. ការដាក់បញ្ចាំងផ្ទាំងរូបភាពជំរុញការប្រើប្រាស់ App NoDrug របស់អាជ្ញាធរជាតិប្រយុទ្ធប្រឆាំងគ្រឿងញៀននៅលើផ្ទាំងប៉ាណូអេឡិចត្រូនិក នៅក្នុងភូមិសាស្ត្ររាជធានីភ្នំពេញ ក៏ដូចជាសាខាតាមបណ្ដាខេត្ត, ៣. ការដាក់តាំងបដាតាមទីតាំងសំខាន់ៗ, ៤. បិទស្ទីកឃ័រ QR Code App NoDrug សម្រាប់បិទផ្សាយនៅលើរថយន្តក្រុង ៦០០គ្រឿង ដែលជូនប្រជាពលរដ្ឋទៅលេងស្រុកកំណើតក្នុងឱកាសបុណ្យចូលឆ្នាំទាញយក និងប្រើប្រាស់ដើម្បីរួមគ្នាប្រយុទ្ធប្រឆាំងគ្រឿងញៀន។

ជាមួយគ្នានេះ ឧត្តមសេនីយ៍ឯក លឹម តុងហួត ក៏បានស្នើសុំ និងផ្ដល់ស្ទីកឃ័រ QR Code App NoDrug សម្រាប់បិទផ្សាយនៅលើរថយន្តក្រុងចំនួន ៦០០គ្រឿង ដែលនឹងជូនប្រជាពលរដ្ឋទៅលេងស្រុកកំណើតក្នុងឱកាសបុណ្យចូលឆ្នាំទាញយក និងប្រើប្រាស់ ដើម្បីរួមគ្នាប្រយុទ្ធប្រឆាំងគ្រឿងញៀនផងដែរ៕