ឯកឧត្តម ពេជ សោភ័ន ទេសរដ្ឋមន្ត្រីទទួលបន្ទុករបសកកម្មពិសេស និងជាប្រធានលេខាធិការដ្ឋាន គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ (គ.វ.អ.) និងលោកជំទាវ ម៉ុក ប៉ូប៉ុនរិទ្ធ អមដំណើរដោយឯកឧត្ដម ឃួង ស្រេង អភិបាលរាជធានីភ្នំពេញនិងលោកជំទាវ នាយប់ថ្ងៃ ទី១២ ខែមេសា ឆ្នាំ២០២៥ បានអញ្ជើញកំសាន្តទស្សនាស្ដង់លក់ទំនិញ កន្លែងលក់ចំណីអាហារ និងទស្សនាសិល្បៈនានានៅផ្លូវថ្មើរជើង (Walk Street)។

សូមបញ្ជាក់ជូនថា ក្នុងសប្ដាហ៌នេះ​ និងសប្ដាហ៌ក្រោយ មន្ទីរវប្បធម៌ និងវិចិត្រសិល្បៈ រៀបចំរបាំប្រជាប្រិយនៅផ្លូវថ្មីរជើង (Walk Street) មានរយៈពេល៥ថ្ងៃ ដោយនៅមុនចូលឆ្នាំ២ថ្ងៃ និងក្នុងថ្ងៃចូលឆ្នាំខ្មែរ ៣ថ្ងៃ។ ផ្អែកតាមការជូនដំណឹងពីមន្ទីរវប្បធម៌ និងវិចិត្រសិល្បៈរាជធានីភ្នំពេញ បានឱ្យដឹងថា មន្ទីរនឹងរៀបចំឲ្យមានទម្រង់សិល្បៈផ្សេងៗគ្នារយៈពេល៥ថ្ងៃគឺចាប់ពីថ្ងៃទី១២ដល់ថ្ងៃទី១៦មេសា ឆ្នាំ២០២៥ ដែលជាថ្ងៃបុណ្យចូលឆ្នាំថ្មីទាំងនៅសង្គ្រាន្តវត្តភ្នំ នារមណីយដ្ឋានវប្បធម៌ប្រវត្តិសាស្ត្រវត្តភ្នំ និងផ្លូវថ្មើរជើង (Walk Street) ដែលរៀបចំឡើងដោយរដ្ឋបាលរាជធានីភ្នំពេញក្រោមការដឹកនាំអនុវត្តផ្ទាល់ពីឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ។ ដោយឡែកនៅតាមបណ្តោយផ្លូវថ្មើរជើងនាមាត់ទន្លេវិញនៅថ្ងៃទី១២ មេសា មានរបាំបួងសួង, ថ្ងៃទី១៣ មេសា មានល្ខោនខោល របាំកន្តែរ៉ែ, ថ្ងៃទី១៤ មេសា មានល្ខោនបាសាក់ យក្ខីនី, ថ្ងៃទី១៥ មេសា មានល្ខោនបាសាក់ និងថ្ងៃទី១៦មេសា មានការសម្តែងក្បាច់គុនល្បុកតោ។

ជាមួយគ្នានេះ​លោកស្រី ដោ សម្ផស្ស នាយិការង និងជាអ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា ផ្លូវថ្មើរជើងជាតំបន់ស្ងួតហាមមិនឱ្យមានការលេងបាញ់ទឹក,ប៉ាតម្សៅជាដើម។ តែបងប្អូនអាចទៅលេងនៅសង្គ្រាន្តវត្តភ្នំបាន។ ក្នុងនាមអាជ្ញាធរដែនដី លោកស្រីដោ សម្ភស្ស បានអំពាវនាវដល់បងប្អូនអាជីវករ លក់ ដូរ ក៏ដូចបងប្អូនអ្នកធ្វើដំណើរទៅលេងកំសាននៅផ្លូវថ្មើរជើងសូមចូលរូមសម្អាត អនាម័យ បរិស្ថានដោយរក្សាបានភាពស្អាតសក្ត័សមជាកន្លែងដើរលេងកំសាន្ត នឹងទាក់ទាញភ្ញៀវទេសចរជាតិអន្តរជាតិផងដែរ៕