«វាលុកចេតិយ» ជាពិធីសាសនាដែលប្រជាពលរដ្ឋខ្មែរតែងតែប្រារព្ធឡើង នៅក្នុងអំឡុងពេលបុណ្យឆ្នាំថ្មី ប្រពៃណីជាតិខ្មែរ។ 

តាមរយៈគណនីផេកព្រឹត្តិការណ៍អង្គរសង្ក្រាន្តនៅថ្ងៃទី១៥ ខែមេសានេះបានឲ្យដឹងថា ពិធីនេះត្រូវបានរៀបចំឡើងដើម្បីប្រាថ្នាផ្សងរំដោះគ្រោះកាច និងឧបទ្រុបចង្រៃ ក្នុងឆ្នាំចាស់ និងបួងសួងសុំសេចក្តីសុខ សេរីមង្គលក្នុងឆ្នាំថ្មី។

តាមប្រភពដដែលបានបញ្ជាក់ទៀតថា ពិធីវាលុកចេតិយ ឬហៅថា «ពូនភ្នំខ្សាច់» គឺគេយកខ្សាច់សុទ្ធ ចាក់នៅកណ្តាលទីធ្លាមួយ ដើម្បីពូនឱ្យចេញជារាងចេតិយ បែរមុខទៅទិសខាងកើត។ តាមទំនៀមប្រជាពលរដ្ឋខ្មែរមានជំនឿថា ពិធីនេះគឺជាការឧទ្ទិសថ្វាយជាតំណាងព្រះចូឡាមណីយចេតិយ ដែលពពួកទេវតាសាងសម្រាប់បញ្ចុះព្រះកេសាធាតុ និងព្រះទាឋធាតុ (ព្រះចង្កូមកែវ) នៅឋានត្រៃត្រឹង្សសួគ៌ ហើយជឿថា នឹងមានផលានិសង្ឃយ៉ាងច្រើន ដូចមានសម្តែងនៅក្នុងរឿង «អានិសង្សវាលុកចេតិយ» មហាសំការសូត្រនោះដែរ។