ក្នុងរយៈពេលមួយខែកន្លងមកនេះ បុគ្គលិកធ្វើការនៅក្នុងប្រទេសថៃ ជាង១៤៤០០០នាក់បានបង់ការងារ ដោយសារតែការឆ្លងរាតត្បាត នៃកូវីដ១៩។

យោងតាមនាយកដ្ឋានការងាររបស់ប្រទេសថៃ បានឲ្យដឹងថា បុគ្គលិកជាង១៤៤០០០នាក់បានបង់ការងាររបស់ពួកគាត់ ក្នុងរយៈពេល១ខែកន្លងទៅនេះ ដោយសារការរាតត្បាត នៃកូវីដ១៩។

សហព័ន្ធនិយោជិត នៃពាណិជ្ជកម្ម និងឧស្សាហកម្មថៃ បានប៉ាន់ប្រមាណថា ចាប់ពីខែមីនា រហូតដល់ចុងបញ្ចប់ នៃរោគរាតត្បាតនេះ យ៉ាងហោចណាស់ ក៏មានបុគ្គលិកចំនួន៦,៥ លាននាក់ នឹងត្រូវគេបញ្ឈប់ពីការងារ។ ក្នុងចំណោមអ្នកទាំងនោះ រាប់បញ្ចូលទាំងពលករចំណាកស្រុក និងអ្នកស្ថិតនៅក្រៅវិស័យនេះ ហើយអ្នករងផលប៉ះពាល់ទាំងនោះ បណ្ដាលមកពីការផ្ទុះឡើង នៃ Covid-19 ។

លោក Suchat Pornchaiwiseskul អគ្គនាយកដ្ឋានការងារបានថ្លែងថា ក្នុងអំឡុងខែមីនាកន្លងមកនេះ បុគ្គលិកចំនួន១៤៤ ៨៦១នាក់ បានចុះហត្ថលេខាទទួលយកអត្ថប្រយោជន៍ពីការអត់ការងារធ្វើ។ ចំនួននេះបានកើនឡើង ៧២ភាគរយ បើធៀបនឹងខែកុម្ភៈ ខណៈមានតែ៨៤១៧៧នាក់ បានដាក់ពាក្យទាមទារអត្ថប្រយោជន៍នេះ។ ប៉ុន្ដែបើធៀបនឹងមករា ស្មើនឹង១០០ភាគរយ ខណៈតាមតួលេខ មានតែ៧៤ ៧៧៥នាក់ ។

លោកអគ្គនាយក បានបន្ដថា ប្រជាពលរដ្ឋដែលបានចូលរួមវិភាគទានដល់បេឡាជាតិរបបសន្តិសុខសង្គមយ៉ាងតិច៦ខែជាប់គ្នា ដោយអាចចុះឈ្មោះសុំជំនួយ តាមរយៈhttps://empui.doe.go.th ឬលេខទូរស័ព្ទ1506។

លោក Chatu Mongol Sonakul  រដ្ឋមន្រ្ដីក្រសួងការងារ បានថ្លែងថា អ្នកបាត់បង់ការងារ ដោយ​សារតែនិយោជកបិទអាជីវកម្ម ព្រោះតែការឆ្លងរាតត្បាត​នៃកូវីដ១៩ មានសិទ្ធិទទួលបាន ៧០% នៃប្រាក់ឈ្នួលប្រចាំខែចុងក្រោយរបស់ពួកគេ ក្នុងរយៈពេល៦ខែ រហូតដល់ ១៥០០០ បាត(លុយថៃ)។

លោករដ្ឋមន្រ្ដី បានបន្ថែមថា សម្រាប់អ្នកដែលលាលែងពីតំណែង បានធ្លាក់ចុះរហូតដល់៤៥ភាគរយ។ ប្រសិនបើបុគ្គលិកត្រូវដាក់ឲ្យនៅដាច់ដោយឡែក ក្នុងរយៈពេល១៤ថ្ងៃ ពួកគេអាចចុះឈ្មោះសម្រាប់ការទទួលសំណងជាមួយនឹងការិយាល័យរបបសន្ដិសុខសង្គមផងដែរ។

បើគិតត្រឹមវេលាម៉ោង១០ព្រឹក ថ្ងៃទី៧ ខែមេសា ឆ្នាំ២០២០ នៅក្នុងប្រទេសថៃ មានអ្នកឆ្លងកូវីដ១៩ ចំនួន២២២០នាក់ ក្នុងនោះស្លាប់២៦នាក់ និងជាសះស្បើយ ចំនួន៧៩៣៕ ប្រែសម្រួលដោយ Nuon