ភ្នំពេញ៖ ករណីឆ្លងវីរុសកូវីដ១៩ ថ្មីចំនួន ២នាក់ និងជាសះស្បើយថ្មីមានចំនួន ៥នាក់ ។ នេះបើយោងតាមសេចក្ដីប្រកាសរបស់ក្រសួងសុខាភិបាល នាព្រឹកថ្ងៃទី៨ ខែមេសា ឆ្នាំ២០២០។

ករណីឆ្លងថ្មីចំនួន ២នាក់នេះ គឺជាការឆ្លងពីប្ដីទៅប្រពន្ធ។ ដោយបុរសជនជាតិខ្មែរជាប្ដី អាយុ ៤៧ឆ្នាំ បានឆ្លងពីជនជាតិចិន ជាមិត្តភក្តិ ដែលមកកម្ពុជា នាថ្ងៃទី២០ ខែមីនា រួចបានត្រឡប់ទៅប្រទេសចិនវិញ ហើយបានរកឃើញមានផ្ទុកកូវីដ១៩ ។ ចំណែកឯភរិយាបុរសខាងលើ អាយុ ៤៥ឆ្នាំ បានឆ្លងពីប្ដី ហើយអ្នកទាំងពីកំពុងដាក់សម្រាកព្យាបាល នៅមណ្ឌលសុខភាពចាក់អង្រែក្រោម។

ចំណែកឯអ្នកជាសះស្បើយថ្មីទាំង ៥នាក់ រួមមាន៖ ២នាក់ជាជនជាតិបារាំង នៅក្នុងខេត្តព្រះសីហនុ និង ៣នាក់ទៀតជាជនជាខ្មែរ នៅរាជធានីភ្នំពេញ ។

គិតមកត្រឹមព្រឹកថ្ងៃទី៨ ខែមេសា ឆ្នាំ២០២០នេះ កម្ពុជា បានរកឃើញករណីឆ្លងសរុបចំនួន ១១៧នាក់ហើយ ក្នុងនោះជាសះស្បើយពីមេរោគកូវីដ១៩ មានចំនួន ៦៣នាក់៕ ដោយ៖ តារា