កាន់តែក្តៅ យោធាចិនបង្កើនការត្រៀមប្រយុទ្ធនៅព្រំដែន LAC

#ឥណ្ឌា# #សង្គម# #នយោបាយជាតិ# #LAC# #ស៊ី ជីនពីង#

2840

ប្រធានាធិបតីចិន ស៊ី ជីនពីង បានចេញបញ្ជាឲ្យកម្លាំងយោធាចិន «បង្កើនការត្រៀមប្រយុទ្ធ» ជាមួយសេណារីយ៉ូអាក្រក់ទាំងឡាយណា ដែលកើតឡើង នៅតាមបន្ទាត់ព្រំដែន (LAC) ជាមួយប្រទេសឥណ្ឌា ។ លោកប្រធានាធិបតី ក៏បានស្នើឲ្យកងកម្លាំងយោធាការពារដែនអធិបតេយ្យរបស់ចិន ឲ្យបានម៉ឺងម៉ាត់បំផុត ។ នេះបើតាមការផ្សាយរបស់ប្រភព Firstpost ថ្ងៃទី២៧ ខែឧសភា ឆ្នាំ២០២០ ។

ប្រភពព័ត៌មានស៊ីនហួ បានបញ្ជាក់ថា ការថ្លែងរបស់លោកប្រធានាធិបតី ស៊ី ជីនពីង បែបនេះ ខណៈចូលរួមកិច្ចប្រជុំពេញអង្គជាមួយប្រតិភូយោធារំដោះប្រជាជនចិន និងកងកម្លាំងប្រដាប់អាវុធប្រជាជនចិន នៅក្នុងសម័យប្រជុំពេញអង្គរបស់សភា ដែលបាននិងកំពុងប្រព្រឹត្តទៅ នាពេលបច្ចុប្បន្ន ។

ប្រភពស៊ីនហួ បានបន្តថា លោកប្រធានាធិបតី ស៊ី ជីនពីង បានបញ្ជាឲ្យយោធាគិតអំពីសេណារីយ៉ូ ដែលអាក្រក់បំផុត បង្កើនការបណ្តុះបណ្តាល និងការត្រៀមប្រយុទ្ធបន្ទាន់ ប្រកបដោយប្រសិទ្ធភាព គ្រប់ស្ថានភាពស្មុគស្មាញ និងការពារដែនអធិបតេយ្យ សន្តិសុខ ហើយការអភិវឌ្ឍឲ្យបានពេញលេញ ។ ជាពិសេស បញ្ហាជាក់លាក់ណាមួយ ដែលបង្កការគំរាមកំហែងដល់ប្រទេសជាតិ។

ការអត្ថាធិប្បាយរបស់លោកប្រធានាធិបតី បានកើតមាន ចំពេលស្ថានភាពប្រឈមមុខឥតឈប់ឈរ បានកើតឡើង រវាងយោធាចិន និងឥណ្ឌា ស្ថិតនៅតាមបន្ទាត់ព្រំដែន (LAC) ។ ព្រំដែននៅក្នុងតំបន់ Ladakh និង North Sikkim រវាងចិន និងឥណ្ឌានោះ គេបានឃើញកម្លាំងយោធាទាំងសងខាងសាងសង់ប៉ុស្តិ៍យាមកាមថ្មីៗនេះ ជាហេតុបង្កឲ្យមានស្ថានភាពតានតឹង ។ ប្រភពរ៉យទ័រ អះអាងថា ព្រំដែនចិន-ឥណ្ឌា (LAC) នោះ មានប្រវែងជិត ៣ ៥០០ គីឡូម៉ែត្រ ៕ ប្រែសម្រួលដោយ៖ thach yat

សេចក្តីថ្លែងការណ៍លើកលែង

អត្ថបទនេះបានមកពីអ្នកប្រើប្រាស់របស់ TNAOT APP មិនតំណាងឱ្យទស្សនៈ និងគោលជំហរណាមួយរបស់យើងខ្ញុំឡើយ។ ប្រសិនបើមានបញ្ហាបំពានកម្មសិទ្ធិ សូមទាក់ទងមកកាន់យើងខ្ញុំដើម្បីបញ្ជាក់ការលុប។