ប្រធានាធិបតីលោក ដូណាល់ ត្រាំ បានមានប្រសាសន៍កាលពីថ្ងៃសៅរ៍ម្សិលមិញថា “អនុម័តកិច្ចព្រមព្រៀងនៅក្នុងគោលគំនិតមួយ” ដែលនឹងអនុញ្ញាតឲ្យ TikTok បន្តប្រតិបត្តិការនៅទឹកដីអាមេរិកក្រោមកិច្ចព្រមព្រៀងជាមួយ Oracle និង Walmart។

ហើយលោកត្រាំក៏បានប្រាប់ទៅអ្នកកាសែតនៅសតវិមានសថា “ខ្ញុំសូមជូនពរជ័យដល់កិច្ចព្រមព្រៀងនេះ” ហើយលោកបានបន្ថែមទៀតថា “ប្រសិនបើពួកគេធ្វើបានសម្រេចនោះជារឿងល្អ ហើយបើសិនជាអត់ទេនោះខ្ញុំក៏គ្មានបញ្ហាអីនឹងរឿងនេះដែរ”។

ហើយលោកក៏បានបញ្ជាក់ទៀតថាលោកជឿជាក់ថាកិច្ចព្រមព្រៀងនោះក៏មានរួមបញ្ចូលនឹងសេចក្ដីព្រួយបារម្ភអំពីសន្តិសុខជាតិរបស់អាមេរិក។ 

ភ្លាមៗបន្ទាប់ពីសន្ទរកថារបស់លោកត្រាំ កាលពីថ្ងៃសៅរ៍ ខាងក្រុមហ៊ុន Oracle បានចេញសេចក្ដីថ្លែងការណ៍មួយដោយប្រកាសថាខ្លួនបានកាប់កាប់ភាគហ៊ុនចំនួន ១២.៥ ភាគរយនៃក្រុមហ៊ុន TikTok Global ហើយក្លាយជាអ្នកផ្ដល់សុវត្ថិភាពបច្ចេកវិទ្យារបស់កម្មវិធី TikTok។ ចំនែកខាង TikTok ក៏បានបញ្ជាក់ពីព័ត៌មានថាជាការពិតហើយបានបន្ថែមទៀតថាខ្លួនក៏កំពុងធ្វើការជាដៃគូពាណិជ្ជកម្មជាមួយ Walmart ផងដែរ។

ក្នុងនោះក្រុមហ៊ុនទាំងពីរនឹងចូលរួមចំណែកក្នុងការផ្ដល់ហិរញ្ញប្បទានជាសាធារណៈជាមុន ហើយពួកគេអាចកាន់កាប់ភាគហ៊ុនរហូតដល់ ២០ ភាគរយក្នុង TikTok Global។ បន្ទាប់ពីនោះ TikTok Global នឹងពង្រីកទីស្នាក់ការនៅអាមេរិក ហើយនឹងបង្កើត ២៥,០០០ ការងារឲ្យប្រជាជាតិទីនោះ។

លោកត្រាំក៏បានប្រាប់ទៅអ្នកកាសែតថា “សន្តិសុខនឹងសុវត្ថិភាព ១០០ ភាគរយ ហើយវាជាដំណោះស្រាយដ៏ល្អមួយសម្រាប់អាមេរិក” ក្នុងនោះរួមទាំង “ក្រុមហ៊ុនថ្មី TikTok នឹងត្រូវគ្រប់គ្រងដោយ Oracle និង Walmart”។ ប្រែសម្រួលដោយ៖ រីតា