ស្ថានឯកអគ្គរាជទូកកម្ពុជាប្រចាំសាធារណរដ្ឋកូរ៉េ ចូលរួមសោកស្តាយចំពោះការវិវត្តនៃការប្រែប្រួលអាកាសធាតុនៅសាធារណរដ្ឋកូរ៉េ ដែលបានបង្កឱ្យមានភ្លើងឆេះព្រៃនៅតំបន់មួយចំនួននៅក្នុងប្រទេសកូរ៉េ។

យោងតាមប្រព័ន្ធផ្សព្វផ្សាយរបស់អាជ្ញាធរកូរ៉េបានឱ្យដឹងថា គ្រោះអគ្គីភ័យនេះនឹងបន្តរីករាលដាលដល់តំបន់ផ្សេងៗមួយចំនួនទៀត ដូចនេះស្ថានឯកអគ្គរាជទូតសូមអំពាវនាវដល់ប្រជាពលរដ្ឋខ្មែរទាំងអស់ ដែលរស់នៅ ធ្វើការ និងសិក្សានៅសាធារណរដ្ឋកូរ៉េ មេត្តាយកចិត្តទុកដាក់ថែរក្សាសុវត្ថិភាព និងទ្រព្យសម្បត្តិរបស់ខ្លួន ព្រមទាំងចៀសវាងការធ្វើដំណើរទៅកាន់តំបន់ដែលមានហានិភ័យខ្ពស់។

តំបន់ដែលរងការឆាបឆេះព្រៃមានដូចជា Andong, Bonghwa, Sancheong, Uiseong និង Ulsan ដែលធ្វើឱ្យប៉ះពាល់ទ្រព្យសម្បត្តិ ហេដ្ឋារចនាសម្ព័ន្ធសំខាន់ៗជាច្រើន ដោយបណ្ដាលឱ្យមានគ្រោះថ្នាក់ និងបាត់បង់អាយុជីវិតប្រជាពលរដ្ឋ ដែលរស់នៅតំបន់នោះ។

ស្ថានឯកអគ្គរាជទូតបានចូលរួមរំលែកទុក្ខជាមួយរដ្ឋាភិបាល ក៏ដូចជា​ប្រជាជន​នៃសាធារណរដ្ឋកូរ៉េ ព្រមទាំង​ក្រុមគ្រួសារ ដែលទទួលរងនូវផលប៉ះពាល់ដោយគ្រោះមហន្តរាយធម្មជាតិនេះ ព្រមទាំងសង្ឃឹមថា​អាជ្ញាធរពាក់ព័ន្ធទាំងអស់ អាចគ្រប់គ្រងស្ថានភាពភ្លើងឆេះព្រៃនេះបានក្នុងពេលឆាប់ៗខាងមុខនេះ។

ជាមួយគ្នានេះ ស្ថានឯកអគ្គរាជទូតអំពាវនាវដល់បងប្អូនដែលស្ថិតនៅក្នុងតំបន់ ឬនៅជិតតំបន់ ដែលទទួលរងផលប៉ះពាល់ មេត្តាមានការប្រុងប្រយ័ត្នខ្ពស់ និងបន្តតាមដានការណែនាំរបស់អាជ្ញាធរ ព្រមទាំងផ្ដល់ព័ត៌មានមកស្ថានទូត ក្នុងករណីបងប្អូនទទួលរងផលប៉ះពាល់ ឬត្រូវការជំនួយផ្សេងៗ តាមរយៈការផ្ញើសារចូលផេករបស់ស្ថានទូត ឬតាមរយៈលេខទូរស័ព្ទរបស់ស្ថានទូត៕