កាកបាទក្រហមសិង្ហបុរី (SRC)  ប្តេជ្ញាផ្តល់ប្រាក់ចំនួន ១៥០,០០០ ដុល្លារសិង្ហបុរី (១១១,៨៥០ ដុល្លារអាម៉េរិក) ដើម្បីគាំទ្រកិច្ចខិតខំប្រឹងប្រែងសង្គ្រោះបន្ទាន់នៃគ្រោះរញ្ជួយដីនៅក្នុងប្រទេសមីយ៉ាន់ម៉ា និងប្រទេសថៃ។

កាកបាទក្រហមសិង្ហបុរីបាននិយាយនៅក្នុងការចេញផ្សាយប្រព័ន្ធផ្សព្វផ្សាយនៅថ្ងៃសៅរ៍នេះថា ការរួមចំណែកនេះនឹងឆ្ពោះទៅរកការដោះស្រាយតម្រូវការបន្ទាន់។ នេះរួមបញ្ចូលទាំងការចែកចាយសម្ភារៈសំខាន់ៗដូចជា អាហារ ទឹក ភួយ និងសម្ភារៈអនាម័យ ដោយសមាគមកាកបាទក្រហមមីយ៉ាន់ម៉ា និងសមាគមកាកបាទក្រហមថៃ។ ការអំពាវនាវអំពីការរៃអង្គាសថវិកាជាសាធារណៈក៏នឹងត្រូវបានដាក់ឱ្យដំណើរការក្នុងពេលឆាប់ៗនេះផងដែរ ។ 

មូលនិធិដែលបានមកពីការអំពាវនាវនេះនឹងគាំទ្រដោយផ្ទាល់ដល់ប្រតិបត្តិការសង្គ្រោះ និងការស្តារឡើងវិញសម្រាប់សហគមន៍ដែលរងផលប៉ះពាល់។

អគ្គលេខាធិការ និងជានាយកប្រតិបត្តិកាកបាទក្រហមសិង្ហបុរី លោក Benjamin William បាននិយាយថា យើងមានការព្រួយបារម្ភយ៉ាងខ្លាំងអំពីសហគមន៍ដែលរងផលប៉ះពាល់។ មនុស្សជាច្រើនបានរងរបួស ផ្លាស់ទីលំនៅ និងត្រូវការជំនួយជាបន្ទាន់។ ការខូចខាតយ៉ាងទូលំទូលាយនៃហេដ្ឋារចនាសម្ព័ន្ធកំពុងរារាំងដល់ប្រតិបត្តិការជួយសង្គ្រោះរបស់ពួកគេ៕