គ្រោះរញ្ជួយដីកម្រិត ៧ រ៉ិចទ័របានវាយប្រហារនៅជិតកោះ Tonga នៅព្រឹកថ្ងៃច័ន្ទនេះ ដែលបណ្តាលឱ្យមានការខូចខាតបន្តិចបន្តួច និងការជម្លៀសខ្លួនមួយរយៈពេលខ្លី មុនពេលការគំរាមកំហែងនៃរលកយក្សស៊ូណាមិវាយប្រហារប្រទេសកោះប៉ាស៊ីហ្វិកបានកន្លងផុតទៅ។

ស៊ីរ៉ែនរលកយក្សស៊ូណាមិបន្លឺឡើង បន្ទាប់ពីការរញ្ជួយដីនៅម៉ោង ១៖១៨ ព្រឹកដោយជំរុញឱ្យអ្នកស្រុកផ្លាស់ទីទៅកាន់ទីទួលខ្ពស់ មុនពេលដែលក្រុមមន្ត្រីផ្តល់ព័ត៍មានច្បាស់លាស់ឱ្យប្រជាជនត្រឡប់ទៅផ្ទះវិញ។

ទីភ្នាក់ងារស្ទាបស្ទង់ភូមិសាស្ត្រអាម៉េរិកបាននិយាយថា ការរញ្ជួយដីបានវាយប្រហារនៅជម្រៅ ២៩គីឡូម៉ែត្រ (១៨ ម៉ាយ) ហើយស្ថិតនៅចំកណ្តាលប្រហែល ១០០ គីឡូម៉ែត្រ (៦២ ម៉ាយ) ភាគឦសាននៃកោះ។ ប៉ុន្មានម៉ោងក្រោយមក ការរញ្ជួយដីកម្រិត៦.១រ៉ិចទ័រលើកទីពីរបានវាយប្រហារនៅតំបន់ដដែល។

មជ្ឈមណ្ឌលព្រមានរលកយក្សស៊ូណាមិប៉ាស៊ីហ្វិកនៅហាវ៉ៃបានចេញសេចក្តីជូនដំណឹងមួយបន្ទាប់ពីការរញ្ជួយដីលើកដំបូងដោយនិយាយថា រលកគ្រោះថ្នាក់អាចកើតមាន ប៉ុន្តែការគំរាមកំហែងបានកន្លងផុតទៅដោយមានតែការផ្លាស់ប្តូរទឹកសមុទ្រតិចតួចប៉ុណ្ណោះដែលត្រូវបានរកឃើញ។ ការព្រមានក៏ត្រូវបានលុបចោលប៉ុន្មានម៉ោងក្រោយមកដោយការិយាល័យគ្រប់គ្រងគ្រោះមហន្តរាយរបស់ប្រទេស។

គួររំលឹកផងដែរ Tonga គឺជាប្រទេសមួយនៅ Polynesia ដែលបង្កើតឡើងដោយកោះចំនួន ១៧១ ដែលមានប្រជាជនត្រឹមតែជាង ១០ ម៉ឺននាក់ ដែលភាគច្រើនរស់នៅលើកោះសំខាន់នៃ Tongatapu ។ វាមានចម្ងាយ ១,៨០០ គីឡូម៉ែត្រ (១,១០០ ម៉ាយ) ភាគឦសាននៃប្រទេសនូវែលសេឡង់ ហើយស្ថិតនៅលើក្រវ៉ាត់ភ្លើងប៉ាស៊ីហ្វិក ដែលជាតំបន់រញ្ជួយដី និងភ្នំភ្លើង៕