សាលាអនុគណក្រុងសៀមរាប សហការជាមួយមន្ទីរធម្មការ និងសាសនាខេត្ត ទទួលបានការគាំទ្រពីព្រះសង្ឃ និងពុទ្ធបរិស័ទពីប្រទេសភូមា បានរៀបចំពិធីបំបួសកុលបុត្រចំនួន ១០០រូប នៅវត្តទេពពោធិវង្ស ក្រុងសៀមរាប កាលពីថ្ងៃទី០៤ ខែមេសា ឆ្នាំ២០២៥។ លោក ឌី រ៉ាដូ អភិបាលរងខេត្ត មានប្រសាសន៍ថា «ពិធីកោរសក់បំបួសកុលបុត្រពេលនេះ គឺជាប្រពៃណី ទំនៀមទម្លាប់ខ្មែរយើងដ៏យូរលង់ណាស់មកហើយ ដែលជាកម្មវិធីមួយត្រូវធ្វើមុនពេលបួសតាមក្រឹត្យក្រមព្រះវិន័យព្រះពុទ្ធសាសនា។ ការស្ម័គ្រចិត្តលះបង់សក់ ជាទីស្រឡាញ់នេះ គឺជាការលះបង់មួយដ៏អស្ចារ្យ ក្នុងភាពជាយុវវ័យ ដើម្បីសាងផ្នួសបួសសងគុណ តបគុណឪពុកម្តាយ និងអ្នកមានគុណទាំងឡាយ ជាពិសេសបំពេញនាទីជាកូនប្រុស តាមប្រពៃណីខ្មែរ»។លោកបន្តថា តាមប្រពៃណី ទំនៀមទម្លាប់ខ្មែរ កូនប្រុសត្រូវតែសាងផ្នួសបួសជាភិក្ខុ ឬសាមណេរ ទោះក្នុងរយៈពេលវែង ឬរយៈពេលខ្លី ត្រូវបានគេឱ្យតម្លៃថា បួសសាមណេរសងគុណម្ដាយ ហើយបួសភិក្ខុសងគុណឪពុកទៀតផង។ ក្នុងខេត្តសៀមរាប វិស័យពុទ្ធសាសនា បានរួមចំណែកធ្វើឱ្យរីកចម្រើនទាំងផ្នែកហេដ្ឋារចនាសម្ព័ន្ធរូបវន្ត វិស័យគ្រប់គ្រង ការផ្សព្វផ្សាយធម៌វិន័យព្រះពុទ្ធសាសនា ក៏ដូចជាវិស័យពុទ្ធិកសិក្សាផងដែរ។ ជាមួយគ្នានេះ លោកក៏ណែនាំឲ្យបង្កើនគំនិតបណ្ដុះគុណធម៌ សីលធម៌ ចរិយាធម៌ឱ្យមានទឹកចិត្ត ស្រឡាញ់គោរព សន្ដោស និងការដឹងគុណនៃអ្នកមានគុណទាំងឡាយរបស់ពលរដ្ឋខ្មែរផងដែរ៕