យោងតាមទីភ្នាក់ងារឧតុនិយម អាកាសធាតុ និងភូគព្ភសាស្ត្ររបស់ប្រទេសឥណ្ឌូណេស៊ី បានឲ្យដឹងថា គ្រោះរញ្ជួយដីកម្រិត ៥.៩រ៉ិចទ័រ បានវាយប្រហារនៅខេត្ត Aceh ភាគខាងលិចប្រទេសឥណ្ឌូណេស៊ី កាលពីព្រឹកថ្ងៃអង្គារនេះតែមិនបង្កឲ្យមានការព្រមានអំពីរលកយក្សស៊ូណាមិឡើយ ដោយសារការរញ្ជួយដីទំនងជាមិនបង្កើតរលកធំៗនោះទេ។

ការរញ្ជួយបានកើតឡើងនៅម៉ោង ២៖៤៨ នាទីព្រឹកម៉ោងនៅទីក្រុងហ្សាកាតា ដោយចំណុចកណ្តាលស្ថិតនៅចម្ងាយ ៦២ គីឡូម៉ែត្រភាគអាគ្នេយ៍នៃទីក្រុង Sinabang ក្នុង Simeulue Regency នៅជម្រៅ ៣០ គីឡូម៉ែត្រខាងក្រោមបាតសមុទ្រ។

លោក Zopan A មន្ត្រីជាន់ខ្ពស់មកពីទីភ្នាក់ងារគ្រប់គ្រង និងកាត់បន្ថយគ្រោះមហន្តរាយខេត្តបាននិយាយថា មិនមានការខូចខាតធ្ងន់ធ្ងរ ឬជនរងគ្រោះត្រូវបានរាយការណ៍នៅក្នុងតំបន់ដែលរងគ្រោះដោយរញ្ជួយនោះទេ ជាពិសេសនៅក្នុងទីក្រុង Simeulue Regency ដែលរងផលប៉ះពាល់ខ្លាំងបំផុត ។

គួរបញ្ជាក់ផងដែរថា ឥណ្ឌូណេស៊ី ជាប្រទេសប្រជុំកោះងាយនឹងរញ្ជួយដី ដោយសារទីតាំងរបស់វានៅលើ Pacific Ring of Fire ដែលមានសកម្មភាពរញ្ជួយ។ ប្រទេសនេះក៏មានភ្នំភ្លើងសកម្មចំនួន ១២៧ និងសកម្មភាព tectonic ញឹកញាប់ផងដែរ៕