មន្ត្រីបារាំង​មួយរូប បាននិយាយទៅកាន់សារព័ត៌មាន​ RT ថា អាមេរិកបានទិញ​ដាច់នូវទំនិញ «ម៉ាស់» មួយយន្តហោះ  នៅក្នុងអាកាសយានដ្ឋានតែម្តង ក្នុងពេលយន្តហោះត្រៀមហោះហើរ ដឹកម៉ាស់ទាំងនោះ​ ទៅកាន់ប្រទេសបារាំង។

បច្ចុប្បន្នប្រទេសក្នុងតំបន់អឺរ៉ុប និងអាមេរិក ប្រឈមនឹងកង្វះខាតសម្ភារ បរិក្ខារពេទ្យ ពិសេសគឺម៉ាស់ការពារការឆ្លងកូវីដ-១៩។ បារាំងបានបញ្ជាទិញម៉ាស់ពីចិន ចំនួន១ពាន់លានម៉ាស់ សម្រាប់ផ្គត់ផ្គង់​ការប្រើប្រាស់ នៅ​ក្នុងប្រទេស​។

នៅក្នុងប្រទេសបារាំង បើតាមច្បាប់ថ្មី​ មន្ត្រីក្នុងរដ្ឋ និងទីក្រុងអាចបញ្ជាទិញសម្ភារ បរិក្ខារពេទ្យ ដោយផ្ទាល់ពីប្រទេសចិន ហើយសងប្រាក់ជាមុនទៀតផង ដើម្បីទទួលបានទំនិញកាន់តែឆាប់បំផុត។ លោក Renaud Muselier មន្ត្រីក្នុងតំបន់ Provence-Alpes-Côte d'Azur និងមន្រ្ដីក្នុងតំបន់ផ្សេងទៀត​បានបញ្ជាទិញម៉ាស់ពីចិន ចំនួន​៦០លានម៉ាស់ ។ ប៉ុន្តែទំនិញទាំងនោះបានជួបបញ្ហាមួយចំនួន ដោយសារ​មិនអាច​ប្រគល់​ទាន់​ពេល នៅថ្ងៃទី​២ ខែមេសា ដោយសារតែអាមេរិកស្ទាក់ទិញម៉ាស់មួយយន្តហោះតែម្តង ដោយហ៊ានឲ្យតម្លៃ លើសទ្វេដង។

លោក Renaud Muselier បានបញ្ជាក់ថា អាមេរិក «អាមេរិកលេងល្បែងខូច» ដោយស្ទាក់ទិញទំនិញដែលបម្រុងបញ្ជូនទៅបារាំង​ ដោយសងប្រាក់នៅកន្លែងចតយន្តហោះតែម្តង។ ទំនិញទាំងនោះ គឺអាមេរិកហ៊ានឲ្យតម្លៃទ្វេដង គឺមួយទៅជាពីរ ឲ្យទំនិញទាំងនោះដឹកទៅដល់អាមេរិក។ ចំណែកបារាំង ត្រូវរង់ចាំទំនិញជើងក្រោយ»។

នៅ​ពេលនេះ​បារាំង​រកវិធានការ​ និងក្រុមហ៊ុនដឹកជញ្ជូន ដែលមិនប្រែប្រួល​ ឬត្រូវគេ​ស្ទាក់ទិញ នៅកណ្តាលផ្លូវបែបនេះ។

ប្រភពព័ត៌មានដែលមិនបញ្ចេញឈ្មោះ បានឲ្យដឹងថា ​« ពួកគេឲ្យតម្លៃខ្ពស់ជាង​ទ្វេដង​ ហើយឲ្យលុយនឹងមុខតែម្តង​ បើទោះជាមិនបានឃើញទំនិញក្តី​៕ ប្រែសម្រួលដោយ៖ MEO