សារព័ត៌មាន​ ANTD ​នៅថ្ងៃទី​១៨ ខែមេសា បានផ្សាយថា មានការផ្ទុះគ្រាប់បែក​ទ្រង់ទ្រាយធំ នៅជិតទីតាំងទាហានអាកាស​រុស្ស៊ី ស្ថិតនៅទីក្រុង​ Kamyshly ភាគខាងជើង ប្រទេសស៊ីរី​។

ប្រភពព័ត៌មាន បានឲ្យដឹងថា ការបំផ្ទុះគ្រាប់បែកនៅពេលថ្ងៃនេះ នៅមិនទាន់មានព័ត៌មាន ស្តីពី អ្នកស្លាប់និងរបួសនៅឡើយ​។ ប៉ុន្ដែបើតាមការស្រាវជ្រាវ បានឲ្យដឹងថា ការបំផ្ទុះខាងលើនេះ គឺ​ជាការវាយប្រហារភេរវកម្ម​ បង្កឡើងដោយក្រុមភេរវករជិតស្និទ្ធនឹងប្រទេសតួកគី ដើម្បីបង្ក​អសន្តិសុខ និងភាពចលាចល​ក្នុងតំបន់។

សូមបញ្ជាក់ផងដែរថា ទីតាំងទាហានអាកាសរុស្ស៊ី​ដែលរងការវាយប្រហារនោះ គឺជាទីតាំងដ៏ធំ​បំផុតរបស់រុស្ស៊ី នៅក្រៅប្រទេស។ មកទល់ពេលនេះ កម្លាំងទាហានរុស្ស៊ី មិនទាន់ប្រតិកម្ម ជុំវិញការវាយប្រហារខាងលើនោះឡើយ។

ការបំផ្ទុះគ្រាប់បែកនេះបានកើតឡើង ក្នុងពេលទាហានតួកគី បើកការវាយប្រហារ​ទៅលើទី​តាំងទាហានជនជាតិ Kurd គឺក្រុម SAA  និង YPG ស្ថិតនៅភាគឦសាន នៃប្រទេស​ស៊ីរី។ បើទោះ​ជាមានបទឈប់បាញ់គ្នាក្ដី ​ប៉ុន្តែតួកគីបានបំពានបទឈប់បាញ់ជាបន្តបន្ទាប់ ហើយ​តួកគី​តែងតែវាយប្រហារទៅលើក្រុមទាហានជនជាតិ ​Kurd នៅខេត្ត​ Al-Hasakah និង Al-Raqqa៕ ប្រែសម្រួលដោយ៖MEO