រ៉ុក្កែត Falcon 9 របស់ក្រុមហ៊ុនឯកជន SpaceX បាននាំ​យក ​ប្រកបដោយជោគជ័យ នូវអវកាសយានិកជើងចាស់ពីររូបរបស់អង្គការ​ ណាសា ​កាលពីថ្ងៃទី​៣០ ខែឧសភា ឆ្នាំ២០២០ ទៅកាន់ស្ថានីយអវកាស​អន្តរជាតិប្រកបដោយជោគជ័យ ។ នេះជាប្រវត្តិសាស្ត្រ​លើកទីមួយ ​ដែល​ក្រុមហ៊ុនឯកជន​របស់អាមេរិក​ បាននាំ​យកមនុស្ស​ទៅកាន់​ស្ថានីយ​អវកាស​អន្តរជាតិបាន ។  

តាមការចេញផ្សាយរបស់ប្រភពព័ត៌មាន ndtv.com បានឲ្យដឹងថា រ៉ុក្កែត Falcon 9 ដែលមាន២ដំណាក់កាលនោះ បាននាំយក​អវកាសយានិក Robert Behnken និង Douglas Hurley ដោយផ្តាច់ខ្លួន​យ៉ាងរលូន​ចេញពីទីបាញ់បង្ហោះ Launch Pad 39A ស្ថិតនៅ​មជ្ឈមណ្ឌល​អវកាស Kennedy រដ្ឋ Florida សហរដ្ឋអាមេរិក ។ ការធ្វើដំណើរ​មានរយៈពេល​១៩ម៉ោង​ ទម្រាំទៅដល់​ស្ថានីយអវកាស​អន្តរជាតិ ។ 

ដំណាក់កាលទី១ រ៉ុក្កែត​បានផ្តាច់ខ្លួន​ថ្មមៗ ហើយចុះចត​នៅត្រង់​លើទូក​មួយ​នៅឯឆ្នេរសមុទ្រ​អាត្លង់ទិក ។ ដំណាក់កាលទីពីរ រ៉ុក្កែតនេះបានផ្តាច់ខ្លួនថ្មម​ៗ ក្នុងការនាំឲ្យអវកាសយានិកទាំងនេះ​ តាមកន្សោមយាន Crew Dragon នៅលើវិថី​របស់ពួកគេ​ឆ្ពោះទៅកាន់​ស្ថានីយអវកាស​ ដែល​មានចម្ងាយ​ប្រហែល ​៤៥០ គីឡូម៉ែត្រ​ពី​លើ​ភពផែនដី​យើងនេះ ។ 

ការបាញ់បង្ហោះ​នាំយក​អវកាសយានិកលើកដំបូង​គេ​ចេញពី​ទឹកដីអាមេរិក ចាប់តាំងពី​កម្មវិធីនេះបានបិទ​កាលពីដំណាច់ឆ្នាំ​២០១១រហូតមកនោះ,​ ដំបូងឡើយ​ មានគម្រោង​បាញ់បង្ហោះ​នៅថ្ងៃទី២៧ ខែឧសភា ឆ្នាំ២០២០ ប៉ុន្តែដោយសារតែអាកាសធាតុមិនអំណោចផល គេបានពន្យារពេល​រហូតដល់ថ្ងៃទី​៣០ ខែឧសភា ទើប​ចាប់ផ្តើមបាញ់បង្ហោះប្រកបដោយជោគជ័យនេះ ។ 

ប្រធានាធិបតី​ដូណាល់ ត្រាំ បានធ្វើដំណើរតាមជើងហោះ​ Air Force One ទៅកាន់រដ្ឋ Florida ដើម្បី​ទស្សនា​ការបាញ់បង្ហោះ​នេះដែរ ដោយលោកពិព័រណ៌នាថា វាពិតជា​ពិសេសខ្លាំងណាស់ ។ «ទេពកោសល្យណាស់ ទេពកោសល្យពិតប្រាកដ​ដែល​គ្មាននរណាអាចធ្វើដូចយើងបាន» ៕ ប្រែសម្រួលដោយ៖ thach yat