PUBG Mobile ដែលយើងស្គាល់ថា ជាហ្គេមកំពុង​ល្បីល្បាញក្នុងស្រទាប់យុវវ័យជុំវិញពិភពលោក កាន់​តែ​បាត់បង់អថិតិជនរាប់សិបលាននាក់បន្ថែមទៀត ក្រោយបញ្ចប់ប្រតិបត្តិការរបស់ខ្លួនជាផ្លូវការក្នុងប្រទេសឥណ្ឌា។

កាលពីខែកក្កដាកន្លងទៅ រដ្ឋាភិបាលប្រទេសឥណ្ឌា បានប្រកាសធ្វើការត្រួតពិនិត្យលើកម្មវិធីផ្សេងៗដែលមានដើមកំណើតពីចិន ក្រោយមកក៏សម្រេចចិត្តបិទកម្មវិធីចិនចំនួន ២៧៥ កម្មវិធីដែលក្នុងនោះមានកម្មវិធីហ្គេម PUBG Mobile ដែលជា​ការអភិវឌ្ឍរួមគ្នារវាងក្រុមហ៊ុនបច្ចេកវិទ្យាចិន Tencent និង Bluehole របស់កូរ៉េខាងត្បូង កាលពីថ្ងៃទី ២ កញ្ញា ជុំវិញភាពមិនប្រក្រតីទាក់ទងនឹងការលួចយកទិន្នន័យឯកជនរបស់អ្នកប្រើប្រាស់ ខណៈរដ្ឋាភិបាលឥណ្ឌា អះអាងអាចប៉ះពាល់ដល់សន្តិសុខជាតិ និងអធីបតេយ្យភាពរបស់ប្រទេសឥណ្ឌា។

ចំណាត់ការពីរដ្ឋាភិបាលឥណ្ឌា ធ្វើឡើងក្រោយប្រទេសចិន សម្រេចចិត្តបិទប្រតិបត្តិការ PUBG Mobile កាលពីដើមខែឧសភាព ២០១៩ ដោយសារតែរឿងនយោបាយ វប្បធម៌ រួមទាំងការយល់ឃើញ ធ្វើឲ្យមនុស្សញៀន និងបង្ហាញរូបភាពហិង្សា។

ទាក់ទងការបញ្ចប់ប្រតិបត្តិការរបស់ខ្លួនក្នុងប្រទេស​មាន​​ពលរដ្ឋច្រើនលើលោក ទាំងពីរនេះ នាំ​ឲ្យ PUBG Mobile ត្រូវបាត់បង់អតិថិជនដល់ទៅខ្ទង់រយលាននាក់ឯណោះ៕

អត្ថបទដោយ៖ រីតា