ផ្នែកខ្លះនៃរដ្ឋ Pennsylvania, New York និង Mid-Atlantic និងរដ្ឋភាគអាគ្នេយ៍នៅតែស្ថិតក្រោមការឃ្លាំមើលរបស់សេវាអាកាសធាតុជាតិសម្រាប់ការខូចខាតដោយសារខ្យល់ និងព្យុះកំបុតត្បូង ខណៈដែលចំនួនអ្នកស្លាប់នៅសហរដ្ឋអាមេរិកដោយសារព្យុះដ៍កំណាចមួយនេះ កាលពីចុងសប្តាហ៍បានកើនឡើងដល់ ៣៦ នាក់នៅទូទាំងរដ្ឋចំនួន ៦ ។

នៅក្នុងសេចក្តីថ្លែងការណ៍របស់សេតវិមាន លោកប្រធានាធិបតី Donald Trump បាននិយាយថា លោកកំពុងតាមដានព្យុះកំបុតត្បូង និងខ្យល់ព្យុះនានា ដោយបន្ថែមថា មនុស្សចំនួន ៣៦ នាក់ត្រូវបានបាត់បង់ជីវិត និងជាច្រើននាក់ទៀតរងរបួស។ លោក Trump បានប្រកាសថា ឆ្មាំជាតិត្រូវបានដាក់ពង្រាយទៅកាន់រដ្ឋ Arkansas ហើយបានសន្យាជួយដល់មន្ត្រីនៅតាមបណ្តារដ្ឋ និងក្នុងតំបន់ដែលរងផលប៉ះពាល់។

សាលារៀន ផ្ទះប្រជាជន ព្រះវិហារ ក៏ដូចជារថយន្តរងការបំផ្លិចបំផ្លាញស្ទើរតែទាំងស្រុង ដោយសារកម្លាំងខ្យល់បក់បោកដ៏អាក្រក់បំផុត ។ លក្ខខណ្ឌអាកាសធាតុដែលមិនអំណោយផល រួមទាំងខ្យល់ព្យុះសង្ឃរា  ត្រូវបានគេព្យាករណ៍ថានឹងប៉ះពាល់ដល់តំបន់ដែលមានប្រជាជនជាង ១០០ លាននាក់។ ខ្យល់បក់បោកក្នុងល្បឿនរហូតដល់ ៨០ ម៉ាយក្នុងមួយម៉ោង (១៣០ គីឡូម៉ែត្រក្នុងមួយម៉ោង) ត្រូវបានព្យាករណ៍ពីព្រំដែនកាណាដាទៅរដ្ឋតិចសាស់ ដោយគំរាមកំហែងលក្ខខណ្ឌនៃខ្យល់ព្យុះនៅតំបន់ភាគខាងជើងដែលត្រជាក់ជាង និងហានិភ័យភ្លើងឆេះព្រៃនៅតំបន់ក្តៅ និងស្ងួតនៅភាគខាងត្បូង៕