ចាប់ពីថ្ងៃទី២៩ ខែមីនា ដល់ថ្ងៃទី០៣ ខែមេសា ឆ្នាំ២០២៥ ខេត្តកំពង់ស្ពឺ និងទទួលរង ខ្យល់បក់ខ្លាំង(ខ្យល់កន្ត្រាក់) ក្នុងល្បឿនកម្រិតបង្គួរ មានភ្លៀង និងផ្គររន្ទះ នេះបើយោងទៅតាមសេចក្ដីជូនដំណឹងរបស់មន្ទីរធនធានទឹក និងឧតុនិយមខេត្តកំពង់ស្ពឺ។ មន្ទីរធនធានទឹក និងឧតុនិយមខេត្តកំពង់ស្ពឺ បានជូនដំណឹងថាដោយសារមានសម្ពាធទាប និងកម្រិតសម្ពាធខ្សោយ បាននិងកំពុងមានឥទ្ធិពលមកលើខេត្តកំពង់ស្ពឺ ដែលស្ថានភាពបែបនេះនិងធ្វើឲ្យ អាកាសធាតុមានពពកច្រើន មានភ្លៀងផ្គររន្ទះ ពីតិចទៅច្រើន បរិមាណ៨០% សីតុណ្ហភាពពី២៥ ទៅ ៣៥ អង្សាសែលស៊ីស និងខ្យល់បក់ខ្លាំង(ឬខ្យល់កន្ត្រាក់) ក្នុងល្បឿនកម្រិតបង្គួរ។អាស្រ័យដូចបានគោរពជម្រាបជូន មន្ទីរធនធានទឹក និងឧតុនិយមខេត្តកំពង់ស្ពឺ បានជូនដំណឹងដល់សាធារណៈជន មេត្តាបង្កើនការយកចិត្តទុកដាក់ និងចូលរួមប្រុងប្រយ័ត្នខ្ពស់ អំពីស្ថានភាពភ្លៀង ផ្គររន្ទះលើសកម្រិតធម្មតា ជាមួយនិងខ្យល់កន្ត្រាក់ ដើម្បីជៀសវាងបានអំពីគ្រោះថ្នាក់ធម្មជាតិផ្សេងៗ ដែលអាចនឹងកើតមានឡើងជាយថាហេតុ។ ខណៈមន្ទីរធនធានទឹក និងឧតុនិយមខេត្តកំពង់ស្ពឺ នឹងបន្តការតាមដានសភាពការណ៍ធាតុអាកាស និង ជម្រាបជូនជាបន្តបន្ទាប់ ក្នុងករណីមានការប្រែប្រួលផងដែរ៕