ប៉ូលីស K9s មកពីកងល្បាត និងប្រតិបត្តិការពិសេស ១៩១ និងក្រុមសង្គ្រោះសុនខ USAR THAILAND K9 បានរកឃើញសញ្ញាជីវិតមនុស្សដែលនៅរស់រានមានជីវិតចំនួន ១៥នាក់ ដែលកំពុងកប់នៅខាងក្រោមគំនរបាក់បែកនៃអគារដែលបានដួលរលំក្នុងស្រុក Chatuchak ក្រោយឥទ្ធិពលគ្រោះរញ្ជួយដីកម្រិត ៧.៧រ៉ិចទ័រ វាយប្រហារប្រទេសថៃ។

លោក Suriyan Rawiwan ប្រធាននាយកដ្ឋានពន្លត់អគ្គីភ័យ និងជួយសង្គ្រោះទីក្រុងបាងកក បានឲ្យដឹងថា ខណៈពេលនេះក្រុមជួយសង្គ្រោះ កំពុងស្វះស្វែងរកវិធីសាស្ត្រដើម្បីជួយសង្គ្រោះយកមនុស្សដែលនៅរស់រានមានជីវិតចេញមកខាងក្រៅ ហើយក្រោមកិច្ចខិតខំប្រឹងប្រែង យើងសង្ឃឹមថាពួកគេនឹងអាចជួយសង្គ្រោះអ្នកដែលនៅរស់រានមានជីវិតបានក្នុងរយៈពេល ៧២ម៉ោង។​ ខណៈគ្រឿងចក្រ​ធុន​ធ្ងន់​ត្រូវ​បាន​យើង​ដាក់ពង្រាយ ​ដើម្បី​បោសសម្អាត​កម្ទេចកម្ទី និង​ជួយ​ក្រុម​ជួយសង្គ្រោះ​ទៅដល់​ជនរងគ្រោះ​។

លោកបន្តថា យើងកំពុងរកវិធីដើម្បីជួយយកមនុស្សចេញ តែផលវិបាក គឺបញ្ហាគំនរបាក់បែកធំៗ ដែលយើងត្រូវគិតទាំងជីវិតអ្នកចូលទៅសង្គ្រោះ បើមានអ្វីខុសតែបន្តិច មនុស្សក៏ជួយមិនបាន ក្រុមសង្គ្រោះក៏អាចមានគ្រោះថ្នាក់ដល់ជីវិតទៀត។ ដូចនេះក្រុមជំនាញសំណង់របស់យើង កំពុងប៉ានប្រមាណ ពីហានិភ័យរបស់សំណង់បាក់បែកនេះ នឹងរកច្រករឺជ្រុងណាមួយដែលអាចឲ្យក្រុមសង្គ្រោះចូលសង្គ្រោះបានលឿន ព្រោះថាបើប្រតិបត្តិការជួយសង្រ្គោះនេះមានការយឺតយ៉ាវ ជនរងគ្រោះដែលជាប់ក្រោមគំនរអាគាក៏អាចមានគ្រោះថ្នាក់ដល់ជីវិតដូចគ្នា។

ជាមួយគ្នានេះ​ អភិបាលក្រុងបាងកក លោក Chadchart Sittipunt ក៏បានចុះត្រួតពិនិត្យទៅដល់កន្លែងបាក់ស្រុត កាលពីព្រឹកថ្ងៃសៅរ៍ ហើយបាននិយាយថា រថយន្តស្ទូចនឹងលើកកំទេចកំទី និងផ្នែកបេតុងដែលជាបំណែកនៃអគារដែលបានស្រុតនោះចេញដើម្បីងាយស្រួលដល់ប្រតិបត្តិការជួយសង្គ្រោះ។

គួរបញ្ជាក់ផងដែរថា ចំនួនអ្នកស្លាប់ដោយសារការដួលរលំនៃអគារនៅក្នុងស្រុក Chatuchak បានកើនឡើងដល់ចំនួន ៩នាក់ហើយ ខណៈដែលមនុស្ស ៧៨នាក់ទៀតនៅតែបាត់ខ្លួន ហើយអត្តសញ្ញាណរបស់ពួកគេក៏មិនទាន់ត្រូវបានបញ្ជាក់ផងដែរ៕